„Ме прашуваат многу често кои лекови да ги понесат на одмор, јас секогаш им велам да не ризикуваат расипување на истите. Децата обожаваат кога местото им е приспособено на нив. Во Малезија собите во хотелот беа целосно во детски стил, па така останавме во хотелот повеќе од предвиденото“, вели во интервју за CRNOBELO.com, Весна Петрова, мајка која со своите 2 деца има мисија да го пропатува целиот свет.

„Се вљубив во камперскиот живот благодарение на мојот сопруг Мартин кога првпат дојдовме во кампот Есперидес во соседна Грција, каде тој и неговото семејство кампуваат повеќе од 30 години. Точно е дека кампувањето бара подобра организација од класично сместување, но благодатите кои ги нуди, особено за децата, се неспоредливи“, вели Загорка Видоевска (38) од Скопје за CRNOBELO.com.

„Во Јапонија не беше културно да се зборува во метро и исто така телефоните мораа да бидат на нечујно. Секаде беше тивко. Дури и во ресторани беше толку тивко што можеше да се слушне тропањето на приборот за јадење“, раскажува Марија Стамболиќ од Скопје за CRNOBELO.com.

„Бев на крстарење со крузер со 5.500 луѓе, од кои 1.500 беа персонал... Една ноќ имаше дожд, бранови и нишање на бродот, во неколку моменти дури морав да се придржам за ѕид и да пазам да не ми се истури пијалакот, но ова е тип на одмор кој им го препорачувам на сите авантуристи“, вели Софија Јанева за CRNOBELO.com.

„Патувањето до Тасос воопшто не е напорно. Од Скопје се патува околу 5 часа со автомобил или 6 часа со автобус, а патувањето на траект е околу 40-тина минути. Картата за траект за автомобил е 35 евра, а за автобус е 20 евра по лице. Овој остров е смарагден рај, а омилена плажа ми беше „La Scala“, споделува Сања Мишковски (33) од Скопје за CRNOBELO.com.

„Додека шетав низ улиците на Менхетен, енергијата на градот ме освои, го посетивме и Бруклин бриџ, едно од најфотографираните места, поради што е задолжителна туристичка дестинација. Малку ме нервираше само фактот дека за одредени атракции во Њујорк се чека ред долго време и има многу бездомници“, раскажува Софија Јанева за CRNOBELO.com.

„Живеењето во Стразбур веројатно не може да се замисли без велосипед како основно превозно средство. Градот е претворен во голема пешачка и велосипедска зона, а возилата се забранети скоро насекаде низ централниот дел на градот. Темпото на живот во градот е поспоро од големите метрополи, но сепак доволно динамично за да никогаш не е здодевно“, раскажува Стефан Маневски за CRNOBELO.com. 

„Љубезноста која ја поседуваат денес племенските припадници, не сум сигурна дали е истата од пред повеќе од еден век, кога биле познати како „head hunters“ (ловци на глави). Како доказ на тоа се и трите човечки глави, како наследство на своите поколенија од нивните предци кои сè уште висат на плафонот на куќата, каде што бевме сместени. Нивните поколенија ги имаат гените од своите предци“, раскажува Валентина Николовска.

„Највоодушевувачка ми беше самата местоположба и релјефот на националниот парк, затоа што се наоѓавме во еден вид кратер, па на која страна и да се свртевме, бевме опкружени со планини. Би го споредил овој национален парк со некое место на Алпите, цело време имате некое такво нереално чувство дека не се наоѓате во Албанија“, вели Александар Петрески за CRNOBELO.com и ни раскажа за патувањето во националниот парк Тет.

На сите им препорачувам да патуваат со деца во Сицилија. Без разлика дали би се одлучиле за летен одмор или активен како нашиот. 

„Локалците во типичните малтешки села имаат навика да испечат локален колач и да ве повикаат на колач и кафе или подготвуваат домашна пица и ве повикуваат да играте „Бинго“ или „Не лути се човече“. Богатите Малтежани од централниот дел ве повикуваат на порачана храна во нивниот пентхаус или викаат готвач да направи скара за сите, а еднаш месечно прават шопинг патување во Италија и Сицилија“, раскажува Александар Василевски од Скопје за CRNOBELO.com, на кој Малта веќе 8 години му е дом.

„Последните 10 години дефинитивно има голема промена на начинот на живот на жените од Саудиска Арабија. Во 2012 им се дозволи на жените да смејат да работат без дозвола од новиот сопруг/татко, а во 2018 се укина законот со кој им се забрануваше на жените да возат“, раскажува Теона Манго од Битола. 

„Односот со локалците на Крит е пријателски и топол, особено ако покажете почит и интерес за нивната култура, навики и традиции. Локалците на Крит се познати по својот гостопримлив дух и отвореност кон туристите. Може да има разлики во навиките и обичаите, но со текот времето и секојдневен контакт можете да се приспособите на нивниот начин на живот“, раскажува Тони Гогов, кој периодов живее и работи на Крит.

„На почетокот, како и на секој иселеник, ми беше многу тешко. Живеевме во чудни услови и како и сите новодојденци во Лондон, делевме куќа со повеќе станари. Тоа беше период во кој сакав да се откажам и вратам назад. Но, никогаш не знаеш што ќе ти донесе животот и каков ќе биде твојот животен пат. Во тој период научивме дека ништо не е така лесно и за сè мораме сами да се избориме и да постигнеме“, вели Никол Динева Гарванлиева за CRNOBELO.com.

„Во Црвената пустина, во областа Ерг Чеби доживеав прекрасно зајдисонце и изгрејсонце. Ноќевавме во пустински камп, имавме забава со берберска музика. Во Аит Бен Хадоу, локалитетот каде се снимени ‘Гладијатор’ и ‘Игра на тронови’, се подготвуваше арената за снимањето на ‘Гладијатор 2’. На патот кон Фез, преспавме во Миделт - тука се отвора едно сосема понакво Мароко - нема веќе пустина, песок и карпи, туку зеленило“, вели Ирена Силјаноска, која неодамна помина 15 дена во оваа африканска земја и сè уште не може да ги собере сите впечатоци и неверојатни доживувања.

Александар и Стефан за време на средношколските денови, како цимери, ограничениот месечен буџет го трошеле за неколку дена. Па, се наоѓале во ситуација кога морале да позајмат пари од некого за да купат автобуски билети, па токму од тие ситуации им се родила желбата и потребата да стопираат до своите родни градови, Пробиштип и Крива Паланка. Тоа им претставувало најекономична варијанта за да се вратат дома. Денес, патувањата со автостоп им се предизвик.

„За Малта заминавме со 2 деца, Петар (6) и Огнен Георги (1) и не можам да кажам дека беше лесно. Во оваа држава на еден дел живеат Балканци, на друг дел Арапи, на трет Малтежани... Но, местото каде што живееме ние Зуриек е дел со претежно малтешка популација...“, раскажува Катерина Величковски (30) од Велес за CRNOBELO.com.

„За македонски државјани за влез во Шри Ланка е задолжителна виза којашто се вади онлајн и чини околу 42 долари. Исто така, два дена пред поаѓање мораш да пополниш формулар за тоа каде ќе бидеш сместен и некои твои лични податоци. Локалците се прекрасни луѓе, секогаш насмеани, фини, културни... Луѓе кои знаат да уживаат и покрај тоа што имаат многу полоши услови за живот од нас“, вели Мери Јаневска за CRNOBELO.com.