„Сè во Африка е како на Марс, сè е различно, а жените се малку старомодни и не по мој вкус... Спротивно на тоа, Мексико го сакам прво заради жените кои се жив оган, а потоа и заради менталитетот“ – раскажува за CRNOBELO.com Филип Гачиќ познат како Путосрање, кој има пропатувано низ повеќе егзотични дестинации низ светот.

„Нигерија како држава важи како една од најопасните, каде што секојдневно голем број луѓе се киднапирани и исчезнуваат. Периодот додека бев таму, покрај обврските со работа, слободното време го користев во посетување на сиропиталишта каде што поминував време со децата, учејќи ги англиски или готвење храна за нив. Еден ден успеав и да им организирам посета на авионот бидејќи беа многу возбудени да видат како изгледа...“, раскажува Ана (31) од Скопје, која потоа доловува како изгледа животот во Дубаи.

„Малдиви можам да го поделам на два дела: ресорти (приватни острови) и локални острови. Иако приватните острови најчесто се оддалечени десеттина минути од локалните, не постои ништо заедничко освен океанот. Ако ги прашате локалците дали би сакале да сменат нешто, во најголем број на случаи ќе слушнете: „не, имам сè што ми треба“...“, раскажува Мими за животот на мал малдивски остров.

„Со партнерот ја работиме истата работа, и двајцата имаме разбирање и почит. Доха нè зближи многу, дури и запросувањето се случи таму, а најубави спомени имаме од Мумбаи, Индија. Бевме поканети на индиска свадба. Како единствени бели луѓе, сето внимание беше кон нас“, раскажува 28-годишата стјуардеса Кристина за CRNOBELO.com.

Александра од Куманово плови низ светот како супервизор на продавници за луксузен накит на крузери и за CRNOBELO.com го раскажува своето искуство од работа на брод – „Аферите помеѓу бродски екипаж постојат, но не е толку перверзно како што се замислува, а многу приказни завршиле со брак.“

„Нов Зеланд е малку поразличен од сите други места на кои сум бил. Досаден, но од друга страна забавен. Голем, но од друга страна мал. Нов Зеланд е како едно огромно село. Секаде е зелено, каде и да се свртите. Веднаш штом излезете од Оукленд, гледате пасишта, овци и планини. Пејзажите изгледаат како да се излезени од разгледници и за среќа нема отровни животни како во соседната Австралија“, раскажува стјуардот Филип Димовски (30) за CRNOBELO.com.

Емилија која потекнува од Куманово, а се школувала во Скопје, на 20 години заминала во Барселона на студии - сега таа за CRNOBELO.com раскажува дека има свое кафуле, изнајмува 3 станови за бизнис луѓе и туристи, вели дека во овој град забава има деноноќно, но дека не е многу лесно достапен град за живот, па и нема многу Македонци. 

„Безбедноста што ја чувствуваме тука и квалитетот на живот се неверојатни. Секоја година Дубаи станува сè подобро и подобро место за живеење. И да ти е отклучен станот, автомобилот или си заборавил нешто во ресторан, нема потреба да се грижиш. Ме иритира само начинот на возење – треба многу трпение, похаотично е од Европа. Се вози брзо и иако има 6 ленти, не сите почитуваат сообраќајни правила“, раскажува Андреа Кидд (35) од Скопје, која работи како фитнес тренер во Дубаи.

„На почетокот ми беше страв и не спиев многу добро ноќе, туширањето не е лесно, во најлошо сценарио се заменува со пливање, но обожавам што секој ден се будам на различно место, и покрај непријатностите – слободата е бесценета, пробајте...“ – раскажува за CRNOBELO.com Лаура од Аргентина која има посетено 50 земји, а живее во комбе во Австралија.

„Се запознавме пред 7 години во Скопје, тој играше фудбал во ФК Работнички, но потоа потпиша договор во Русија. Се сеќавам спиевме и двајцата со слушалки на уши, и вклучен повик 24/7. Тој доаѓаше повремено во Скопје да ме види и јас одев во Русија. И така функциониравме 2 години, потоа уште 2 години додека играше и во Казахстан. Овој период од врската ни беше посебен и нема никогаш да го заборавам …“, раскажува Ана Најдовска (31) од Скопје, која моментално со сопругот и ќерката живее на Кипар.

Александра Крстевска (23) магистер по бизнис администрација, која сака патување, латино амерички танци и веќе 14 години свири на флејта, по неколку години патување и посетување на различни земји, веќе 2 години живее и работи во Португалија.

Али Вишам од Малдиви е водич за екскурзии и веќе 15 години работи во секторот за туризам.

„Јапонија е земја којашто се разликува од сите други земји што сум ги посетила. Носењето на заштитни маски беше сосема нормално кај нив уште пред да се појави Ковид19 вирусот и ми беше многу чудно, па разбрав дека ги носат маските девојките што сакаат да ги покриваат нивните лица кога немале време/не сакале да се нашминкаат или луѓе кои сакаат да покажат дека не им се комуницира премногу...“, раскажува Антоанела Филева (25) доктор по општа медицина, за CRNOBELO.com.

Сандра Цветковска по природа е човек којшто сака да учи и истражува, па поради тоа постојано ги поместува своите граници на тоа што е возможно за неа.

„Филипинците се весел народ, сите пеат! Многу сакаат да пеат, може да си влезеш во продавница и вработените да си пеат додека редат по полиците. Исто така, многу се религиозни, во недела одат во црква на миса. Но, живеевме на 22-ри кат од 60-катница и кога се случуваше да има земјотрес во 3 часот по полноќ беше доста страшно искуство. Тајфуните исто така не беа баш пријатни, а вулканот беше капак на сè …“, раскажува Сандра Малетски (32) за животот на Филипини.

Димитар Амски од Скопје себеси се доживува како личност која не сака да биде дел од системот. Стремежот кон спојот на работа, забава и патување го натерало да размислување надвор од кутијата и го споило со прекрасни луѓе со кои заеднички создава, а истовремено му го овозможил и овој номадски начин на живот.

„Катар се смета за една од најбогатите држави во светот, а со тоа доаѓаат и едни од највисоките цени на светот, каде што на пример средна цена на кафе е 500 денари и најобичен оброк во ресторан почнува од 2.300 денари. И да, да не заборавиме, во лето е топло, многу топло …“, раскажува Филип Димовски (30) од Скопје, кој работи како стјуард во Qatar Airways со седиште во Доха, Катар.

Марко Илиески (20) од Прилеп, студент на Градежен факултет во Скопје, каде што и живее е уште еден авантурист кој секој момент сака да патува и целиот свој живот е поврзан со различни спортови, а најмногу се има задржано на одбојка и кошарка.