Почина Андреј Ѓорѓиески од ДНК – го загуби животот во пожарот во дискотеката во Кочани

Детали

недела, 16 март 2025

За жал, Андреј Ѓорѓиески го загуби животот на 42-годишна возраст, во трагичната несреќа, по пожарот кој избувна во дискотеката „Пулс“ во Кочани. 

Помеѓу големиот број жртви по пожарот кој избувна синоќа во дискотека во Кочани, за жал е и Андреј Ѓорѓиески, членот на ДНК, кој наводно се вратил во локалот за да помогне на други луѓе. 

Цело утро за него се споделуваа апели да се пронајде, дека не се знае каде е, па по информацијата дека наводно е лоциран во болницата во Штип, за жал осамна потврда за неговата смрт кај медиумите и блиските колеги. 

За Сакам да кажам, близок пријател на Андреј открил дека пејачот го идентификувала неговата сопруга според часовникот што го носел на раката.

Дел од колегите и блиските веќе се простуваат од него на социјалните мрежи, меѓу кои Лила, Миа Костова, Тамара Тодевска... 

Миа Костова објави фотка со него, во позадина со хитот на ДНК „Ако утре ме нема“ и напиша:

„Срце планина. Си ја отпеа. Траор. Ужас. Пекол од ден“.

Зад себе, Андреј ги остави сопругата Наталија и ќерката Јана.

Освен по музичката кариера, беше познат и по тоа што беше голем хуманитарец и заедно со Панчо имаа помогнато на голем број семејства и лица кои имаа потреба од секаква помош. 

Во катастрофалниот пожар, животот го загубија уште неколку членови на бендот, меѓу кои Ѓорѓи Горѓиев, тапанар во бендот на ДНК, Александар Ефремов, фотограф кој секаде ги следеше Андреј и Панчо на сите настапи, Филип Стевановски и Александар Коларов, клавијатуристот и гитаристот во бендот. 

Во трагичниот настан, досега е потврдено дека загинаа 59 лица, но информациите се менуваат постојано. 

Андреј беше роден на 9 февруари 1982 во Скопје, а својата заедничка музичка кариера со Панчо ја започнаа во 2001 година кога го објавија првиот сингл „Девојка за везден“.

Последна информација за Владимир Блажев - Панчо, е од неговата сестра утринава, која потврди дека е во болница во Скопје, со изгореници на раката и на кислородна поддршка. 

Панчо од ДНК хоспитализиран во Скопје по синоќешниот пожар – објавени неофицијални листи со примените во скопските болници

Дел од останатите на естрадата кои се простуваат од Андреј: 

Лила Филиповска

Куме мој 
Навикната бев да ви ги споделувам новите песни и спотови на ДНК со години наназад. Никогаш не помислив дека сега ќе споделам ваква тажна, претажна вест.
Кога ми ја пушти песната “Ако утре ме нема” ти реков дека многу ми се “свиѓа” без да помислам дека таа песна ти ја претскажа тажната судбина.
Те нема веќе куме ама само физички… во срцата на оние кои те сакаат ќе те има засекогаш.

Летај куме летај со ангелите и чувај нѐ од горе а ние вечно ќе те памтиме и ќе ни фалиш.

Искрено и длабоко сочувство до твоето прекрасно и неутешно семејство.

Тамара Тодевска 

 М. М. | Црнобело