Детали за хеликоптерот кој се сруши во Њујорк: Загина семејство со 3 деца, биле на одмор и го разгледувале градот

Детали

петок, 11 април 2025

„Имаше многу силен звук и видов како нешто се открши од хеликоптерот. Се движеше многу брзо и само падна во водата“ – велат очевидци за страшната несреќа во која загина директорот на Siemens во Шпанија, заедно со неговата сопруга и децата, додека правеле разглед на градот за време на одморот во Њујорк. 

Вчера (10.04) во реката Хадсон во Њујорк се сруши хеликоптер при што загина петчлено семејство со три деца.

Покрај семејството, во хеликоптерот бил и пилотот кој исто така загинал.

Меѓу загинатите е Агустин Ескобар – извршниот директор на огранокот на Siemens во Шпанија, неговата сопруга и нивните три деца на возраст од 4, 5 и 11 години.

Пилотот кој управувал со хеликоптерот бил на возраст од 36 години.

Бизнисменот и неговото семејство, кои живееле во Барселона, пристигнале во Њујорк утрото во четврток, а попладне платиле за панорамска тура со хеликоптер низ Њујорк.

Најморничаво е што семејството среќно позирало пред и во хеликоптерот, непосредно пред несреќата.

Хеликоптерот полетал околу 15 часот и се срушил околу 16 минути по полетувањето.

Некои очевидци велат дека го виделе како се скршил пред да падне во реката, додека некои велат дека слушнале и многу силен звук.

На видеата што се споделуваат на социјалните мрежи се гледа дека на хеликоптерот му се откршува пропелерот пред да падне во вода.

Еден од очевидците е 30-годишна девојка која ја видела несреќата од нејзиниот дом.

„Беше страшно. Мислев дека слушнав гром и 10 секунди подоцна го видов хеликоптерот како паѓа, па потона.

Испаничив и потоа видов уште едно делче од хеликоптерот како паѓа во водата. Во солзи се молев дека некој ќе ги спаси.

Посакував некој да преживее, многу сум тажна“, вели младата жена за Daily Mail.

И друг очевидец вели дека слушнал некој многу силен звук:

„Имаше многу силен звук и видов како нешто се открши од хеликоптерот. Се движеше многу брзо и само падна во водата… Не сум видел нешто слично досега“, вели тој за ABC.

Надлежните велат дека уште е рано да се тврди што ја предизвикало несреќата.

Но, сопственикот на компанијата која ги организира турите вели дека пилотот кажал дека немаат гориво.

„Пилотот се јави и ни кажа дека ќе слета за да наполни гориво. Требаше да стигне за околу три минути, но поминаа 20 минути и тој не се појави.

Тогаш добив повик од менаџерката која ми кажа дека имало несреќа и тогаш почнаа ми ѕвонат сите.

Потоа еден од моите пилоти леташе над реката Хадсон и го виде хеликоптерот превртен наопаку.

Смртта на дете, на кое било човечко битие, е огромна катастрофа“, вели сопственикот за The Telegraph.

Според првичните изјави на полицијата во Њујорк, пилотот најверојатно изгубил контрола и паднал во реката.

Спасувачките екипи работеле до доцна во ноќта и излекувале остатоци од хеликоптерот, додека телата на патниците веднаш биле извлечени.

Четворица загинале на самото место, додека двајца им подлегнале на повредите подоцна.

Загинатиот бизнисмен бил мошне успешен во својата земја и во 2022 година станал извршен директор на огранокот на Siemens во Шпанија.

Бил дипломиран индустриски инженер и долг период работел во енергетскиот сектор, пред да се вработи во Siemens.

Спирова С. | Црнобело