„Не гори само Универзална, гори симбол на Скопје и спомени од фестивали“ – Емотивни објави по пожарот

Детали

вторник, 09 април 2024

„Гори местото каде што се одржувале Златно славејче, Скопски фестивал, Златна Бубамара, гори симболот на солидарноста по скопскиот земјотрес изграден со помош на донации од 35 земји“ – напиша Божидар Божиновски, но и многу други граѓани се потсетуваат на спомените од Универзална, откако утрово избувна пожар кој го изгоре објектот.

По пожарот кој утрово (9-ти април 2024) го зафати објектот на Универзална сала, кој веќе е локализиран, граѓаните објавуваат емотивни статуси и твитови на социјалните мрежи за објектот кој е многу повеќе од само обична градба. 

За потсетување, по катастрофалниот земјотрес во Скопје во 1963-та година, започнала изградбата на Универзална сала, како последица од проблемот со простор во кој ќе се организираат манифестации во разрушениот град.

Во 1965-та година никна објектот кој е изграден со материјална помош од 35 земји од светот, а стана трајно одбележје и симбол на обновата на градот Скопје. 

Во Универзална сала се одржани бројни културни настани, фестивали, концерти, драмски претстави, детски приредби кои будат спомени кај сите.

Во продолжение издвојуваме објави од социјалните мрежи во кои граѓаните се потсетуваат на времињата во Универзална сала:

Не гори само Универзална, гори еден симбол на Македонија, гори местото каде што се одржувале Златно славејче, Скопски фестивал, Златна Бубамара, гори симболот на солидарноста по скопскиот земјотрес изграден со помош на донации од 35 земји…

Гори срцето на Скопје.

Горат сите спомени на Скопје.

Не ве можам, се запаливте!

Со Универзална изгоре и последниот бастион на спомените на моето детство во Градот убав

М. М. | Црнобело