Српскиот комичар „BalkanDad“ им даде македонска ракија на водители во Австралија: „Со ова се убиваат бактерии“

Детали

вторник, 11 февруари 2025

„Ништо не може да те разбуди како чашка ракија наутро“ - напишаа водителите од утринската емисија во Австралија, кои за првпат пробаа македонска ракија која им ја донесе српскиот Инстаграм комичар, познат како BalkanDad, кој им покажа како се прави типичен балкански појадок, а за време на престојот тој проба и македонски бурек. 

Милош Недељков, на социјалните мрежи потпишан и познат како „BalkanDad“, е Србин кој уште на 1 година со семејството се преселил во Нов Зеланд, а потоа живеел и во Австралија, но на крај се вратил во родната земја.

Тој креира комична видео содржина, во која најмногу се фокусира на типичните балкански татковци, нивното однесување, реакции и чудни навики и манири кои тешко дека ќе ги разбере некој кој не е роден на овие простори.

Кликнете на видеото за да го погледнете:

Речиси секогаш на себе носи долна машка маица, или пак блуза ставена внатре во тренерките или панталоните, во комбинација со високи чорапи над ногавицата, а во уста секогаш има чачкалица за заби. 

Кликнете на видеото за да го погледнете:

Тој честопати патува во земјите од регионот и споделува искуства оттаму, но и ги пробува највкусните традиционални балкански специјалитети.

Сега Милош е во Австралија, каде освен што наоѓа локали каде се нуди храна од балканската кујна, промовираше и македонска дестилерија и бурекчилница, а гостуваше и во утринска емисија, каде на водителите им даде да пробаат македонска ракија.

Прочитајте и Јован и Никола имаат бурекчилница во Австралија: „Продаваме скоро 30 вкусови на бурек, ама најбарани се со месо и сирење“

Кликнете на видеото за да го погледнете:

Во емисијата водителите го претставија како српската сензација балкански татко, комичар од Источна Европа, кој на публиката ќе ѝ покаже како се прави класичен балкански појадок.

Во секое негово видео, гостување или подготовка на јадење има доза на хумор и шеги на сметка на типичните Балканци, па така и тука, ги насмеа дури и Австралијците кои беа малку зачудени од комбинацијата. 

Во емисијата, тој на шега вели дека типичните Балканци немаат проблем да се напијат ракија и на гладно за убивање бактерии, па им даде на водителите да пробаат македонска ракија, која им ја претстави како слаба.

Но, нивната реакција изгледаше како да не пробале ништо со појак вкус и на Инстаграм видеото напишаа: „Ништо не може да те разбуди како чашка ракија наутро“.

„Во балканскиот појадок има од сè по малку – јајце за протеин, сланина којашто е многу здрава, српски колбас, сирење, домат, кисели краставички, лук и кромид, јогурт...

Се посолуваат сите јадења и се јаде со вистински леб, кој се крши, овој вашиот на коцки е лажен леб“ – вели Милош за време на подготовката на оброкот, а ги изненади водителите кога се напи од водата од теглата со кисели краставички.

Погледнете го неговото гостување во утринска емисија во Австралија:

Прочитајте и Српскиот јутјубер „Balkandad“ воодушевен од посетата на Македонија – Јадеше симит погача, прошета по црквите и се возеше со жичница

М. М. | Црнобело