Го намалува стресот и уште 6 потенцијални придобивки од билката ашваганда

Ограничен број студии покажале дека користењето ашваганда како додаток во исхраната има потенцијал да го намали стресот, но и да го подобри сонот.

Ашваганда е билка од Индија и Југоисточна Азија.

Претставува важен дел од ајурведата, односно традиционалната медицина што потекнува од Индија.

Од растението се прави екстракт или прав кој со векови се користи како народен лек за анксиозност, па и проблеми со плодност.

Во последно време, ашвагандата како додаток во исхраната станува популарна и кај нас.

Истражувањата за дејството на суплементите со ашваганда се ограничени, но некои студии сепак покажале потенцијални придобивки.

Важно е да се нагласи дека ашвагандата не може да замени соодветни терапии препишани од лекар и не треба да се користи како лек за посериозни заболувања.

Дел од потенцијалните придобивки од ашвагандата во продолжение:

Може да помогне во намалувањето на стресот и анксиозноста

Ова е всушност најпознатата придобивка од ашвагандата.

Мали истражувања имаат покажано дека во период од околу два месеца, може да се намалат нивото на стрес и симптомите на анксиозност доколку се користи ашваганда.

Сепак, според некои експерти, овие докази не се доволни за да се потврди дека ашвагандата може да се користи како третман за анксиозност.

Односно, ако имате анксиозно нарушување, консултирајте се со експерт за соодветна терапија.

Може да го зголеми нивото на тестостерон кај мажите

Мала студија покажала дека користењето ашваганда не само што го зголемува нивото на тестостерон, туку има добро влијание и врз плодноста кај мажите.

Односно, кај испитаниците се покажало зголемена концентрација на сперматозоиди.

Може да го намали нивото на шеќер во крвта

Ашвагандата може да биде од корист за лицата со дијабетес или оние со високо ниво на шеќер во крвта.

Суплементите го намалиле нивото на шеќер во крвта кај испитаниците, но сепак овие истражувања се ограничени.

Односно, не треба да третирате дијабетес или високо ниво на шеќер само со ашваганда.

Може да ги регулира воспалителните процеси во организмот

Студии направени на животни покажале дека ашвагандата има потенцијал да ги намали воспалителните процеси во телото.

Во истражување со луѓе, ашвагандата се покажала донекаде корисна, но во комбинација со други билки.

Може да биде добра за мозокот

Анализа на неколку студии покажала дека ашвагандата може да има позитивно влијание врз когнитивните способности кај луѓето, особено кај постари лица.

Друго истражување покажало дека можно е да ја подобрува меморијата.

Може да го подобри квалитетот на сонот

Ашвагандата често се користи како помагало за спиење, а неколку помали студии покажуваат дека навистина може да биде корисна.

Според наодите, можно е да има позитивно влијание врз квалитетот на сонот, но и да им помогне на луѓе кои страдаат од несоница.

Како се користи ашваганда и дали има несакани ефекти?

Ашвагандата најчесто се продава во форма на капсули или прав.

Препорачливо е да не се користи повеќе од три месеци бидејќи нема доволно истражувања за долгорочното влијание.

Секако, треба да се консултирате со експерт пред да почнете да ја користите, особено ако имате постоечки проблеми со здравјето.

Луѓе за кои ашвагандата може да не биде безбедна:

• Бремени жени
• Доилки
• Лица со рак на простата
• Лица кои земаат лекови за депресија, а анксиозност и слично
• Лица кои имаат автоимуна болест или проблеми со тироидата
• Личности кои имаат проблеми со црниот дроб

Некои луѓе пријавиле и несакани ефекти од ашваганда, како:

• Болки во стомакот
• Дијареја
• Повраќање

Кога станува збор за дозирањето, секогаш следете го упатството и не ја надминувајте препорачаната доза.

Спирова С. | Црнобело