Здравствени проблеми со кои може да се соочите кога е многу жешко (и кога да одите на лекар)
Дехидратација, осип на кожата, но и топлотен удар – кои се најчестите здравствени проблеми кои се јавуваат кога времето е многу жешко?
Периодов, надворешните температури рушат рекорди, па не треба да се изненадите доколку не се чувствувате најдобро, дури и ако немате сериозни или хронични проблеми со здравјето.
Високата температура има негативно влијание врз телото, особено ако престојувате надвор во најтоплиот дел од денот, и скоро сите се соочуваат со некаков проблем.
Дел од најчестите проблеми со кои може да се соочите кога е многу жешко:
Влошување на постоечките здравствени проблеми
Екстремно високите температури можат да ги влошат проблемите со здравјето.
Оние кои имале инфаркт или мозочен удар, или имаат предиспозиции за истите, се изложени на поголем ризик.
Исто така, може да се влошат проблемите со бубрезите, астмата и другите респираторни болести, особено ако и воздухот е загаден.
Дехидратација
Дехидратацијата настанува кога во телото нема доволно течности за нормално функционирање.
Симптомите вклучуваат:
- Жед
- Сува уста
- Темна или урина со силен мирис
- Главоболка и вртоглавица
- Раздразливост и проблеми со размислувањето
Топлотна исцрпеност
Топлотната исцрпеност е посериозна состојба која може да премине во топлотен удар. Се случува кога температурата на телото се зголемува до 38 степени Целзиусови.
Симптомите вклучуваат:
- Обилно потење
- Бледа кожа
- Грчење на мускулите
- Слабост
- Вртоглавица, главоболка
- Гадење, повраќање
- Губење свест
- Забрзано чукање на срцето
Ако забележувате симптоми на топлотна исцрпеност, важно е да реагирате веднаш.
Влезете во разладена просторија. Пијте вода, но не многу одеднаш, туку помали голтки. Пробајте да се разладите со влажна крпа.
Ако чувствувате дека ќе изгубите свест, побарајте помош.
Топлотен удар
Топлотниот удар има слични симптоми како исцрпеноста, но е многу посериозна состојба бидејќи температурата на телото надминува 39-40 степени Целзиусови.
Симптомите вклучуваат:
- Збунетост
- Губење свест
- Обилно потење или жешка и многу сува кожа
- Грчење на мускулите
- Брзо дишење
- Забрзан пулс
Ако мислите дека вие или некој друг има топлотен удар, препорачливо е веднаш да повикате брза помош.
Во меѓувреме, влезете во разладена просторија, пијте вода и пробајте да се изладите.
Грчење на мускулите
Топлото време може да предизвика грчење и болка во мускулите, најчесто во стомакот, рацете и нозете.
Оваа состојба обично се јавува по обилно потење, кога на телото му недостасуваат сол и вода.
Ако не чувствувате други симптоми освен грчењето на мускулите, доволно е да отидете на студено место, да пиете повеќе вода и да одморите барем неколку часа.
Ако состојбата не ви се подобрува, обратете се кај лекар.
Осип на кожата
Поради обилното потење, кожата може да се иритира и да предизвика осип.
Оваа иритација може да се јави кај секој, но не е најчеста кај бебиња и помали деца.
Обично осипот се јавува на вратот, половината, препоните, под градите и пазувите.
Осипот најчесто поминува по неколку дена, без потреба од третман.
За да ви помине побрзо, избегнувајте да излегувате кога е најжешко за да го намалите потењето, областа каде што имате осип чувајте ја сува и носете облека од природни материјали, како памук.
Кои луѓе се изложени на поголем ризик?
Како што спомнавме на почетокот, секој може да се соочи со некаков проблем на многу жешко време, без разлика на неговата здравствена состојба.
Сепак, постојат неколку ризични групи:
- Луѓе над 65 години
- Бебиња и мали деца
- Бремени жени
- Луѓе со постоечки здравствени проблеми
- Луѓе кои примаат одредени лекови, како диуретици
- Луѓе кои работат на отворено
Спирова С. | Црнобело
Би можело да ве интересира:
![](https://www.crnobelo.com/media/com_jvrelatives/images/thumbs/com_content_108464_400.jpg)
![](https://www.crnobelo.com/media/com_jvrelatives/images/thumbs/com_content_110537_400.jpg)
![](https://www.crnobelo.com/media/com_jvrelatives/images/thumbs/com_content_108630_400.jpg)
![](https://www.crnobelo.com/media/com_jvrelatives/images/thumbs/com_content_108438_400.jpg)
![](https://www.crnobelo.com/media/com_jvrelatives/images/thumbs/com_content_110719_400.jpg)
![](https://www.crnobelo.com/media/com_jvrelatives/images/thumbs/com_content_104338_400.jpg)