Зголемен број на случаи со „слатка краста“ во Хрватска - Дали е опасна и како да се заштитите?

„Најмногу ги погодува децата, а ако вашето дете добие ваква инфекција, не би требало да се дружи со други деца“ – препорачуваат хрватските дерматолози, откако една девојка се пожали дека додека била на море заболела од „импетиго“ или „слатка краста“.

Импетиго или „слатка краста“ е инфекција на кожата што е предизвикана од бактеријата Staphylococus. Најчесто се јавува кај малите деца или кај лицата со ослабен имунитет, но може да се јави и кај возрасните.

Една девојка од Сплит, за хрватските медиуми раскажува како заболела од оваа инфекција, а по неколку дена истата почнала да се шири и кај нејзините пријателки.

„Бев на одмор со пријателките и на плажата забележав мала црвена точка на усната.

Мислев дека е херпес, затоа што се случува често да ми се појави кога ќе ми падне имунитетот.

Но, по враќањето дома, таа точка почна да се шири и израсна во меурчиња со вода.

Ја дезинфицирав и се намачкав со маст за рани, но ништо не ми помагаше“ – вели таа.

По посетата на лекар, било утврдено дека оваа девојка добила „слатка краста“, па веднаш ѝ биле препишани антибиотици и антибиотска маст.

„Искрено не знам дали е од постелнината во апартманот, или од морето“ – вели таа и додава дека во болница ѝ рекле дека ова лето голем број луѓе им доаѓаат со истиот проблем.

„Јас имам красти на брадата и телото, друга пријателка има околу усната, третата има на грбот. Имам и покачена температура и сè ме чеша“.

Дерматологот од Загреб Гордана Бубичиќ – Бајек за 24sata.hr вели дека годинава на територијата на Сплит е забележан голем број случаи кои заболеле од оваа болест.

Инфекцијата кај децата најчесто се јавува околу устата и носот, односно на лицето, но може да се јави и на другите делови на телото.

Најпрво изгледа како ситни точки, по што се појавуваат меурчиња, а со оглед на тоа што децата постојано се чешаат, крастите брзо се пренесуваат и на другите делови на телото.

Докторката вели дека нема причина за страв, затоа што не станува збор за опасна болест, ниту пак за комплицирано лекување.

„Важно е лекувањето да се започне што е можно порано, штом ќе се појават меурчињата. Тогаш најчесто е доволно лекување со локална примена на антибиотската маст.

Во исклучителни случаи, кога болеста брзо ќе се прошири, се дава антибиотик орално и импетигото се повлекува за неколку дена“ – појаснува таа.

Инаку, со цел да се спречи понатамошно ширење на болеста, пожелно е лицето или детето што боледува од импетиго да се изолира од другите.

Бактеријата многу лесно се шири во топли и влажни услови, а гребаниците или иритациите на кожата помагаат таа уште полесно да се рашири, затоа што на тој начин бактериите многу полесно навлегуваат во кожата.

Б. С. Б. | Црнобело / фото: depositphotos.com