Како да го одвикнете детето од грицкање нокти?

Помогнете му на вашето дете да разбере дека грицкањето нокти е навика која треба да се прекине, особено затоа што може да предизвика инфекции и проблеми со забите.

Навиката за грицкање нокти е често присутна кај возрасните, но и кај малите деца. А, оваа навика е нехигиенска и проблематична за здравјето на детето.

Со текот на времето, оваа навика може да се изгуби, но кај некои деца таа останува до подоцна во животот, па дури е присутна и кога се возрасни личности.

Неколку стратегии кои може да ви помогнат да го одвикнете вашето дете од грицкање нокти:

Зборувајте отворено за негативностите од оваа навика

Можеби детето несвесно ги грицка ноктите, па најдобро е прво отворено да зборувате за тоа.

Помогнете му на вашето дете да разбере дека грицкањето нокти е навика која треба да се прекине, особено затоа што може да предизвика инфекции и проблеми со забите.

Исто така, може да зборувате поопширно за хигиената и да го запознаете со тоа дека не е добро да ги става прстите во уста.

Редовно сечете ги ноктите

Сечете ги редовно ноктите, така што детето ќе нема што да грицка, а и ќе бидете сигурни дека бактериите и нечистотиите кои се наоѓаат под ноктите детето нема да ги внесе во својот организам.

Измислете си ваша игра

Наместо постојано да му зборувате на детето да не ги грицка ноктите, измислете некоја игра со која ќе го поттикнете да прекине.

На пример, може да изберете одреден збор или специфичен допир со кое детето ќе се потсети дека треба да престане со грицкање на ноктите.

Понудете му замена

Помогнете му на детето да ги држи рацете зафатени со други работи. На пример, нека држи гумени топчиња.

Ова може добро да функционира ако детето ги грицка ноктите поради стрес или анксиозност.

Користете систем на наградување

Секој ден кога детето нема да ги грицка ноктите, понудете му мала значајна награда или заедно одбројувајте ги деновите во одредена табела.

Поставете си цел и заедно настојувајте што побргу да ја остварите.

Изберете нови забавни активности

Ако детето ги грицка ноктите од досада, предложете му нови активности. Боенки, табла за цртање, сложувалки…

Сето ова ќе ја поттикне креативноста и ќе остави помалку слободно и време за досада.

Исто така, во периодите кога на детето му е досадно, може да излезете во парк, да возите велосипед, заедно да готвите…

Зошто детето ги грицка ноктите?

Повеќето експерти го опишуваат грицкањето нокти како навика за која детето не е ни свесно.

Навиките се развиваат поради три главни причини:

Досада. На детето на кое му е здодевно може да почне да ги грицка ноктите затоа што нема нешто друго да прави.

Ослободување од стрес. Некои деца ги грицкаат ноктите во непријатни ситуации и кога сакаат да се ослободат од стресот (нешто слично како посегнување по чоколадо).

Релаксирање. Некои деца го цицаат палецот за да заспијат, додека други може да ги грицкаат своите нокти.

Најчесто не треба да ве загрижува оваа навика, но треба да му помогнете на детето да се ослободи од неа поради тоа што таа може да биде штетна за забите, но и на тој начин да внесе различни бактерии кои се штетни за здравјето.

М. Ѓ.| Црнобело / фото: freepik.com