Рибар поминал 95 дена изгубен среде Тихиот Океан во својот брод: „Јадев лебарки за да преживеам“

Детали

вторник, 18 март 2025

Рибар од Перу преживеал 95 дена на својот рибарски брод во Тихиот Океан откако залутал и се изгубил по силна бура.

61-годишниот Максимо Напа Кастро запловил во океанот на 7-ми декември од пристаниште во гратче на јужниот брег на Перу.

Во својот рибарски брод имал доволно храна за две недели, колку и што планирал да му трае патувањето.

Но, на десеттиот ден го затекнала силна бура, па неговиот брод залутал низ океанот.

Кога не се вратил дома, неговото семејство веднаш пријавило, но спасувачките екипи никако не можеле да го лоцираат.

Максимо бил пронајден минатата среда (12.03), оддалечен дури 1.000 километри од брегот.

Бил дехидриран и во критична состојба по 95 дена без доволно храна.

„Не сакав да умрам. Јадев лебарки, птици и последно што јадев беше морска желка“.

Доста често на рибарските бродови може да се најдат лебарки и други инсекти, што на Максимо секако му било во прилог додека траела неговата голгота.

Максимо вели дека на бродот успевал да собере вода од врнежи од дожд, но останал без храна.

Притоа, не се наоѓал во област каде што може да лови риба, додека две недели пред да биде најден веќе немал сила ни да лови птици.

Па, вели дека пред да го пронајдат, немал јадено скоро 15 дена.

„Имам внука која нема наполнето ни една година. Постојано мислев на неа, но и на мајка ми. Благодарен сум му на Бог што ми даде втора шанса“, вели рибарот за телевизија во Перу.

Мајката и ќерките на рибарот, пак, велат дека никогаш не изгубиле надеж дека ќе биде пронајден.

Иако бил во критична состојба, Максимо брзо се стабилизирал откако му била дадена соодветнатамедицинска помош.

Спирова С. | Црнобело