Стотици волонтери ги чистат улиците, луѓе фрлаат кал по кралот и кралицата – Шпанија по разорните поплави (фото+видео)

Детали

понеделник, 04 ноември 2024

Стотици волонтери излегоа на улиците за да помогнат во расчистувањето на пустошот што го оставија поплавите во Шпанија, додека толпа гневни локалци фрлаа со кал по кралот Фелипе и кралицата Летиција и ги обвинуваа за трагедијата.

Разорните поплави што ја погодија Шпанија минатата недела зад себе оставија пустош и најмалку 200 загинати.

Спасувачките тимови, но и волонтерите, уште трагаат по исчезнати, што значи бројот на жртви може да биде и поголем.

Во неделата (03.11), шпанскиот премиер Педро Санчез изјави дека ова е најголемата поплава со која се соочила Шпанија во изминатиот век.

Премиерот додаде и дека во Валенсија, која беше едно од најпогодените места, се испратени 10.000 војници, додека кон Мадрид се упатиле околу 200, со цел да помогнат во расчистувањето и наоѓањето тела и исчезнати лица.

На фотографиите направени по поплавата се гледа дека улиците се полни со кал и ѓубре, а на многу места има и автомобили заглавени во калта.

А, покрај надлежните, и стотици волонтери излегоа на улиците за да им помогнат на своите сограѓани.

Опремени со лопати и метли, расчистуваат низ улиците, бидејќи, како што велат, надлежните не пристигнуваат да им помогнат на сите и тие се единствената надеж за некои луѓе.

„Шпанците излегоа на улица по катастрофалните поплави во Валенција за да помогнат да се расчистат улиците од кал, да спремаат храна за погодените од поплавите, а фармери излегоа со нивните трактори за да отстрануваат отпад“, стои во Инстаграм објава со неколку видеа од волонтерите.

Во коментари, пак, многумина истакнуваат колку се горди на нивните сограѓани.

„Ова што го работат е опасно и заморно. Луѓето пешачат километри за да стигнат до поплавените места“.

„Јас сум од Валенсија и сум многу тажна, но и многу горда на моите луѓе“.

„Неверојатно е да се види во живо на што се подготвени луѓето за да им помогнат на соседите во ужасната трагедија“.

Во меѓувреме, многумина ги обвинуваат властите за лошо справување со кризата, а толпа луѓе ги нападна и шпанскиот крал Фелипе и неговата сопруга – кралицата Летиција.

Кралскиот пар излезе на улиците на шпанскиот град Паипорта кој е еден од најсилно погодените.

На улиците веќе имаше толпа луѓе кои протестираа и кои почнаа да фрлаат кал по кралот и кралицата, но и да ги навредуваат.

На некои фотографиии и снимки се гледа кралицата Летиција со кал на лицето и облеката додека разговара со дел од присутните.

На крај, интервенираше и полиција за да го заштити парот од гневните локалци.

Фотографии и видеа од последиците од поплавите во продолжение:

Продолжува на следната страница...