На 4 години го избркале од дома, 2 години живеел со улични кучиња – Неверојатна приказна на момче од Русија

Детали

сабота, 02 ноември 2024

Момчето на 4 години било избркано од дома, а било спасено од улични кучиња кои му помагале да најде храна и го топлеле за време на руските зими. Неверојатната приказна на Иван Мишуков, остави без зборови многумина.

Приказната за Иван Мишуков, момчето спасено од улични кучиња во Русија во 2019-та година беше топ тема откако беше објавен филмот Ivan and the Dogs, а во повеќе пригоди и сам раскажувал како изгледал неговиот живот додека 2 години живеел на улица.

Филмот ја обработуваше приказната на момчето, кое во родната Русија уште е познато и како малиот Могли, а она што тој го преживеал во најмала рака делува неверојатно.

На возраст од само 4 години, Иван од градот Реутов, во близина на Москва се нашол на улица.

Иван со тетка му која го избркала на улица

Тој бил роден во 1992-та во дисфункционално семејство. На мајка му ѝ било одземено старателството, таткото не живеел со неа и не сакал да се грижи за синот.

Момчето било дадено во грижа на баба му и дедо му. Додека баба му била жива, момчето пак имало соодветни услови за живот, но откако таа починала, дедо му почнал да пие многу, а тетка му имала партнер кој не го сакал детето во куќата.

Малиот Иван цело време бил бркан надвор, на улица, сè додека не се спријателил со улично куче, кому му го дало името Лиза.

Набрзо, ним им се придружиле уште десетина други улични кучиња.

Иван почнал секое утро заедно со кучињата да моли за храна во локалните пекарници и од случајните минувачи, кои се сожалувале и им фрлале по некоја корка леб.

Кучињата и Иван заедно ја делеле храната, а во студените зимски ноќи се туткале до него и го топлеле за да не смрзне на студот.

Иван живеел заедно со кучињата 2 години, а неговите роднини воопшто не се ни обидувале да го најдат.

Понекогаш соседите му давале облека и храна, што тој ја делел со своите влакнести пријатели и заштитници.

Кога сфатил дека полицијата го брка, Иван почнал да се крие и да си ги прикрива трагите за да не го одделат од кучињата, но еден ден конечно успеале да го најдат и да го однесат во сиропатилиште.

Со помош на едни трговци кои го хранеле момчето, властите конечно успеале да го одделат детето од глутницата.

„Се обидуваа да ме земат од кучињата неколкупати, но кучињата ги напаѓаа минувачите и полицајците. Некаде по петтиот обид, полицајците успеаја да ме извлечат.

Секогаш влегував сам во пекарницата, а кучињата ме чекаа надвор.

Тој ден влегов внатре, ми дадоа храна и кога станав да си одам, двајца полицајци ме грабнаа и ме извлекоа низ задната врата.

Ме ставија во автомобил и ме возеа долго, со цел да ги загубат моите кучиња, кои трчаа по нас. Се чувствував како да ме зеле од семејството“ – раскажа Иван.

Кучињата успеале да ја следат неговата трага и со денови лаеле и чекале пред институцијата каде што бил сместен Иван.

Откако неколку недели не можеле да се ослободат од кучињата, локалните власти одлучиле да ги усмртат.

„Знам дека ако не беа тие кучиња, немаше да преживеам на улицата“ – изјави Иван во една пригода.

Набрзо потоа, Иван бил посвоен од страна на неговата мајка Татјана Бабанина, која се грижела за него со многу љубов и дала сè од себе момчето да стекне образование и да ги има сите неопходни услови за живот.

„Денес таквата приказна може да звучи неверојатно, затоа што секој веднаш би повикал полиција ако види 5-годишно момче со кучињата на влезот од зградата.

Но, тоа беа 90-тите години и беше многу тежок период за нас.

Сите се бореа за да преживеат и да си го прехранат семејството“ – раскажува Татјана.

Таа истовремено се грижела за 26 посвоени деца, а неколку години подоцна Иван сам побарал да се запише во воено училиште.

Додека растел Иван се истакнал со своето знаење, а по завршувањето на образованието се вратил да живее во родниот град, каде што работел во фабрика.

Иван со жената што го посвоила

Вели дека на 14 години дознал дека неговата биолошка мајка Евгенија не можела да се грижи за него заради тоа што била алкохоличарка, но ѝ простил и не ја обвинува.

Б. С. Б. | Црнобело