Диета од 21 ден со ограничен број на калории, која дозволува и слатки задоволства

Ригорозните и краткотрајни диети се покажаа како лоши и неефикасни на долгорочен план, бидејќи изгубените килограми можат да се вратат за кратко време.

Затоа, сите нутриционистички издржани диети траат најмалку 21 ден, бидејќи толкав период му е потребен на телото за да се адаптира на новиот режим на исхрана. Во тие 21 денови, организмот се прилагодува на новиот начин на исхрана, а заедно со него и сите физиолошки процеси.

Во зависност од тоа колку килограми сакате да изгубите, диетите се делат во три категории, односно планови и тоа: внес од 1.200 до 1.500 калории дневно; внес од 1.500 до 1.800 калории дневно; и внес од 1.800 до 2.100 калории дневно.

Во текот на денот се јадат шест мали оброци со максимално растојание измеѓу од три часови, а акцентот е на непроцесираната храна.

Поради нискиот внес на калории, дозволени се и слатки задоволства. Доколку во сето тоа додадете и одредена физичка активност, резултатите ќе бидат уште подобри.

Дајте си доволно време за да се навикнете на диетите и тогаш ќе можете да ги почувствувате саканите бенефити.

Пример за дневно мени од 1.200 до 1.500 калории:

Појадок: Две варени јајца и домашно подготвено колаче од овесни снегулки, банана и боровинки

Ужинка: Една оризова галета со путер од кикирики

Ручек: Салата од 100-120 грама варено пилешко месо, еден домат, две свежи пиперки, марула, зачинета со маслиново масло и оцет

Ужинка: 12 бадеми

Вечера: Една тиквичка полнета со 150 грама мелено месо, зачинето по желба и едно овошје како десерт

Ужинка: Мала чинија пуканки

Пример за дневно мени од 1.800 до 2.100 калории:

Појадок: 100 грама овесна каша, 3 лажици путер од бадеми и 200 грама свежо шумско овошје по избор

Ужинка: Едно парче интегрален леб со авокадо и малку домат

Ручек: Чорба од мелено мисиркино месо, со домати, кромид, пиперка, подготвена со маслиново масло

Ужинка: Таратур со една краставица и нискокалорично кисело млеко

Вечера: Шницла или стек од 200 грама, два варени компира, 50 грама динстувани печурки и боранија

Ужинка: Една банана

За средното мени, комбинирајте ги предложените менија. Секогаш точно знајте колку калории внесувате со оброкот, за да можете да имате контрола врз тоа колку треба да потрошите. Водете дневник на намирници, правете комбинации, а за да ви биде полесно, планирајте го неделното мени однапред.

Бидејќи станува збор за голема промена во начинот на исхрана, препорачливо е да се консултирате со лекар пред да ја почнете диетата.

Е. Д. | Црнобело