Совети за нега на стапала на студено време + маски што можете да ги направите дома

Купката со топла вода, и тоа само неколку минути дневно, може да ви направи значајна разлика ако имате груби и испукани стапала.

Во период кога воздухот е постуден и сув, може да страда и нашата кожа. Дополнително, ветерот уште повеќе ја отежнува ситуацијата, при што од особена важност е да посветите поголемо внимание на негата на кожата.

Покрај лицето и дланките, не заборавајте да обрнете внимание и на стапалата кои во овој период може да страдаат доста.

Неколку совети за нега на стапала во постудените денови:

Хидратацијата е од голема важност

Не заборавајте доволно и добро да ги хидрирате вашите стапала. Најпрво, пијте многу вода во текот на денот, зашто внатрешната хидратација ќе ви помогне да го одржите нивото на влажност во стапалата и да спречите дополнителна сувост.

Покрај ова, користете соодветни кремови или лосиони чиишто состојки длабоко ќе навлезат во вашата кожа и ќе спречат сувост и пукнатини.

Купка за стапала со топла вода

Секојдневното потопување на стапалата во топла вода и тоа само неколку минути, може да ви направи значајна разлика ако имате груба и испукана кожа.

Потоа, исушете ги добро и нанесете хидратантен крем, при што ќе ги задржите меки и мазни.

Масажа во текот на денот

Ако сте во можност, во текот на денот масирајте ги стапалата со малку крем, при што ќе ја зголемите циркулацијата на крвта на тоа место и ќе ја ослободите мускулната напнатост.

Не ги заборавајте чорапите

За здрави и меки стапала во текот на постудените месеци, препорачливо е постојано да носите чорапи, а најдобро е да изберете пар од природни материјали како што е памукот.

Носете соодветни обувки

Секако, во зима треба да одберете чевли или чизми кои обезбедуваат соодветна изолација и заштита од студ и влага.

Изберете обувки изработени од материјали што „дишат“ и кои правилно одговараат на вашите стапала за да избегнете притисок кој може да ви направи дополнителни проблеми.

Хранете се здраво и правилно

Несомнено, правилната исхрана игра значајна улога за здравјето на вашата кожа, вклучувајќи ги и стапалата.

Консумирајте храна богата со маски киселини, витамини и минерали, како што е авокадо, јаткасти плодови и лиснат зеленчук.

Покрај ова, настојувајте и редовно да вежбате, така што ќе си ја подобрите циркулацијата на крвта.

Нанесете маска за стапала

За да имате здрави и мазни стапала, тогаш мора да одвоите време за да користите маски наменети токму за нив, кои ќе ги хидрираат и ќе ги одржуваат меки и мазни.

Како самите да подготвите маски за стапала во домашни услови?

Стапалата особено се сушат во текот на зимската сезона, што неретко резултираат со мртва кожа и пукнатини.

Во продолжение погледнете неколку маски за стапала кои може да ги подготвите самите во домашни услови, а не само што ќе ги хидрираат стапалата, туку и ќе ги нахранат за време на зимските месеци.

Најпрво, пробајте ја оваа лесна и евтина маска, за која ви треба 1 лимон, 4 лажички шеќер и половина лажичка сол. Измешајте ги овие три состојки додека не добиете смеса како паста. Потоа, нанесете од овој пилинг на вашите стапала пред да се бањате и оставете да делува околу триесетина минути. Потоа исплакнете темелно.

Лимонот ќе ви ги освежи стапалата и ќе ја отстрани лошата миризба. Шеќерот и солта, пак, ги ексфолираат и ја отстрануваат мртвата кожа. Покрај ова, лимонот има и антигабични својства.

Уште една маска која може да ја пробате е со гел од алое вера и вазелин. Потребни ви се 1 лажица гел од алое вера и 1 лажица вазелин - измешајте ги добро додека не добиете мазна паста. Нанесете ја маската на стапалата пред спиење, па оставете го да се впие во текот на ноќта.

Гелот од алое вера длабински ја храни и хидрира кожата, а вазелинот не само што ќе ви ги навлажни стапалата, туку и ќе формира заштитна бариера на кожата за да спречи понатамошно оштетување.

Покрај овие две, вреди да ја испробате и маската со кокосово масло и сол. Ставете 2 лажици кокосово масло во сад и 2 лажици сол. Измешајте ги добро и нанесете на стапалата пред да се туширате и оставете да делува околу триесетина минути. Потоа добро исплакнете.

Кокосовото масло ќе ги хидрира стапалата, а солта ќе ви помогне да ја отстраните мртвата кожа.

М. Ѓ | Црнобело / фото: freepik.com