Прашувам за пријател: Мојот нов дечко не знае дека имам дете – како да му кажам, а да не ме остави?

„Проблемот е во тоа веќе двапати бевме на состанок, а јас не сум му кажала дека имам ќерка. Колку повеќе чекам за да му кажам, толку повеќе ме фаќа паника и сметам дека кога конечно ќе се отворам, работите ќе бидат уште полоши. Што да правам?“ – прашува една млада девојка.

На некои девојки може да им се случи да останат бремени рано во животот, и да не се со татковците на нивните деца, но дали тоа значи дека заради ставот да не бидат отфрлени од идните партнери, треба да лажат дека немаат деца?

Дали само девојките што се сингл и без „багаж“ заслужуваат да ја бараат среќата?

Се чини дека девојките што млади станале мајки се ограничени во поглед на изборот на партнер, затоа што малку се оние партнери што би сакале да се справуваат со родителството во младоста, а тој проблем не постои само кај нас на Балканот, туку и пошироко во светски рамки.

Една девојка се соочува со ваква дилема и побара помош од колумнистка на Daily Mirror, Колин.

Во продолжение писмото на девојката во целост:

„Јас сум самохрана мајка во 20-тите години од животот. Ќерка ми има речиси 2 години и немам никаков контакт со нејзиниот татко. Тој е женкар и побегна во првиот миг кога му соопштив дека сум бремена.

Знам каде живее, но среќна сум што тој не е дел од нашите животи.

За среќа, моите родители и моите пријатели ме поддржуваат и ја сакаат ќерка ми.

Пред неколку месеци почнав повторно да запознавам потенцијални партнери онлајн и запознав еден дечко што навистина ми се допаѓа – изгледа добро, љубезен е и речиси ги исполнува сите критериуми што ги барам кај еден маж.

Но, проблемот е во тоа што не сум му кажала дека имам ќерка, а веќе двапати бевме на состанок. Колку повеќе чекам за да му кажам, толку повеќе ме фаќа паника и сметам дека кога конечно ќе се отворам, работите ќе бидат уште полоши.

Не се срамам од ќерка ми воопшто, но мислам дека ме загрижува тоа што ако му кажам за ќерка ми, тој ќе избега.

Постојано сум нервозна заради ова.

Само сакам да уживам во младоста и да имам можност да запознавам нови луѓе, но свесна сум дека поголемиот дел од луѓето на моја возраст немаат деца и не сакаат да ги имаат.

Ако му кажам сега, тој ќе мисли дека сум луда или лажга...

Што да правам?“

Во продолжение советот на Колин:

„Веќе знаеш што ќе те советувам: Мораш веднаш да му ја кажеш вистината.

Колку повеќе молчиш, толку повеќе се вложуваш во врската и толку повеќе ќе се чувствуваш скршено ако тој ненадејно одлучи да стави крај на врската.

Но, јас сметам дека е многу поверојатно да ти раскине затоа што си го лажела, отколку заради тоа што имаш дете. Не значи дека секој маж ќе побегне кога ќе се соочи со вистински проблем.

Но, ако му ја кажеш вистината и тој каже дека не е заинтересиран за врска, тогаш тоа значи дека тој не е вистинскиот човек за тебе затоа што ќерка ти е дел од тебе и нема преговори за неа.

Тој треба да сфати дека вие двете одите во пакет и нема потреба да се обидуваш да изградиш врска со некој што не може тоа да го сфати.

Исто така, ако запознаваш мажи онлајн во делот со биографските податоци треба да напоменеш дека имаш дете. На тој начин веднаш ќе знаеш дека мажите што те контактираат знаат каква ти е ситуацијата и немаат проблем со тоа.

Ако овој дечко е навистина љубезен како што велиш дека е, тогаш сигурно ќе те разбере. Ќе треба да му нагласиш дека прво си сакала да дознаеш дали се сложувате пред да ја спомнеш ќерката.

Ако продолжите да се состанувате, од него не можеш да очекуваш веднаш да стане татко на ќерката. Потруди се работите да се одвиваат бавно и немој ниту да помислуваш да го запознаеш со ќерката пред да бидеш сигурна дека тој е вистинскиот.“

Б. С. Б. | Црнобело