Вежби за рамни стапала – ја намалуваат и болката
Рамните стапала се релативно честа појава и можат да предизвикаат болка, па препорачливо е да преземете нешто во врска со нив, како правење вежби.
Околу 20% од луѓето ширум светот имаат рамни стапала, а оваа појава може да предизвика болка при одењето.
Ако имате рамни стапала и имате проблеми како болка, консултирајте се со ортопед.
А, истовремено, можете да правите и вежби кои ја подобруваат состојбата на стапалата.
Шест вежби кои ќе ви бидат од помош:
Прва вежба
Седнете и ставете крпа под стапалата.
Без да ја кревате петата, фатете ја крпата со прстите и повлечете ја кон вас, па пуштете ја.
Направете 2-3 сета, со по 15-тина повторувања со секоја нога.
Втора вежба
Седнете на стол со исправен грб и под стапалото ставете тениско топче.
Две-три минути правете кружни движења со ногата со помош на топчето, па повторете со другото стапало.
Трета вежба
Седнете на стол и прекрстете ги нозете како на сликата – десниот глужд да ви биде врз левото колено.
На кренатото стапало заврзете ластик за вежбање, а другиот крај од ластикот ставете го под ногата што ви е на подот.
Почнете да го движите кренатото стапало горе-долу со помош на рацете.
Направете два сета со по 10 повторувања со секоја нога.
Четврта вежба
Ова е вежба што е препорачливо да ја правите неколкупати во денот.
Седнете на стол и поставете ги стапалата на подот.
Кренете ги прстите за да се направи лак на долниот дел од стапалото, па свиткајте ги прстите – на овој начин мускулот во стапалото ќе остане стегнат.
Држете ја положбата пет секунди и направете по пет повторувања со секое стапало.
Петта вежба
Застанете пред ѕид и потпрете се со рацете на него.
Со едната нога направете чекор назад и пробајте да ја спуштите петата што е можно поблиску до подот, како на илустрацијата.
Треба да почувствувате истегнување во листот, но не и болка.
Држете ја положбата околу една минута, па повторете со друга нога.
Шеста вежба
Седнете на стол и кренете го палецот на ногата, додека останатите четири прсти ви се на земјата.
Држете ја положбата пет секунди.
Потоа спуштете го палецот на подот, а кренете ги другите прсти и држете ја положбата пет секунди.
Направете по десет повторувања со секое стапало.
Спирова С. | Црнобело
Би можело да ве интересира:





