„Бев на одмор во Грција, ме опече виолетова медуза - како ми реагираше телото?“

Детали

четврток, 30 јуни 2022

„Верувајте дека не ве пече само местото каде што ве опекла – целото тело се ежи, се тресе“.

Периодов во Грција на многу плажи се забележани виолетови медузи. Поради ова, грчките медиуми објавија и мапа на која се прикажани плажите со најмногу вакви медузи.

Изгореницата од овие медузи може да биде многу болна, а болката може да трае и до две недели.

Иако најчесто изгорениците не се опасни, болката може да биде многу интензивна и да се појават и други симптоми како вртоглавица и повраќање.

Прочитајте повеќе: Мапа со виолетови медузи во Грција + зошто се опасни и што треба да правите ако ве опече?

Жена од Црна Гора имала лошо искуство со виолетова медуза во Грција. Со цел да ја зголеми свеста за опасноста од овие медузи, своето искуство го споделила на Фејсбук групата Live From Greece.

Нејзината објава во продолжение:

„Ме опече медуза во Дасија. Виолетова. Не е сеедно!

Првиот ден изгорев, вториот ден ме опече медуза, а сопругот ми рече да внимавам следниот ден ајкула да не ми ја изеде ногата.

Имав идеја да напишам објава за тоа како морето ја вади целата негативна енергија (со која бев полна) без разлика дали сте во Паралија, Ситонија, Крф или на кое било друго место, и без разлика дали јадете паштета или се храните во ресторани, важно е да сте на море. Дека во оваа животна лудница сте успеале себеси и на семејството да им овозможите море!

Но, ме нападна медуза. Ужасно чувство. Со оглед на тоа дека пораснав на море, можам да кажам дека оваа е навистина проблематична. Лекарот ми рече дека и за нив е непозната.

Верувајте ми дека не пече само местото каде што ве каснала, целото тело се ежи, се тресе. Ова е навистина ужасно чувство. Внимавајте на децата“.

Сепак, ова не значи дека кај секого има иста реакција.

Спирова С. | Црнобело