Како сопругата на Лионел Меси го величи на социјалните мрежи + зошто му дадоа црна наметка? (фото)
- Детали
- понеделник, 19 декември 2022
„Конечно успеа, знаеме дека страдаше долги години... Ти благодариме што нѐ научи дека никогаш не треба да се откажуваме“ – му порача сопругата на Лионел Меси по финалето во Светското првенство во Катар. Меси доби посебна чест во Катар да носи црна наметка додека го креваше пехарот. Што значи тоа?
Аргентина е победник на Светското првенство во фудбал. На натпреварот што вчера (18.12) се одигра во Доха, Катар. Аргентина на пенали успеа да ги совлада Французите и по 36 години повторно да го освои трофејот.
Сопругата на Лионел Меси (35), Антонела Рокузо (34) објави повеќе семејни фотографии на кои се гледа како тие двајца заедно со трите деца ја прославија победата.
„Не знам ниту како да почнам... Премногу сме горди на тебе. Ти благодариме што нѐ научи дека никогаш не треба да се откажуваме и дека треба да се бориме сѐ до крајот.
Конечно успеа и ти си светски шампион, знаеме дека страдаше долги години и дека сакаше да го постигнеш ова...
Напред Аргентина“ – напиша таа до фотографиите на кои целото семејство се радува на освоениот пехар.
За време на свечената церемонија во која на Аргентина ѝ беше врачен победничкиот трофеј, Лионел Меси носеше црна наметка, што претседателот на ФИФА Џани Инфантино и емирот од Катар Тамим бин Хамад Ал Тани му ја облекоа пред да го подигне пехарот.
Многумина се запрашаа кое е значењето на ваквата наметка. Според Arab News, оваа наметка се нарекува „бишт“. Традиционално се изработува од волна и може да биде во бела, беж и црна боја.
Во минатото ваква наметка носеле бедуините, а денес се носи во посебни пригоди, како свадби, фестивали и на други семејни и религиозни прослави.
Биштот во основа е симбол на престиж и статус и најчесто вакви наметки носат само богатите членови во заедницата.
Со двата гола што Меси ги постигна за време на натпреварот и оној еден од пенали, тој уште еднаш покажа дека е достоен да ја носи оваа наметка, како предводник на тимот што успеа да го освои Светското првенство во Катар.
Инаку, Меси информира дека нема намера да се пензионира од репрезентацијата и дека ќе продолжи понатаму да се натпреварува во дресот на Аргентина.
Погледнете повеќе фотографии од Лионел со семејството во продолжение:
Б. С. Б. | Црнобело
Би можело да ве интересира:
Препорачуваме
Најчитани неделава
