Роверот Perseverance ги испрати првите фотографии од површината на Марс и кратерот Jezero

После патувањето од речиси 500 милиони километри кое траеше околу половина година, роверот Perseverance безбедно слета на површината на Марс, а само неколку минути подоцна пристигнаа и првите фотографии.

Вчера роверот на НАСА ја почна потрагата по живот на црвената планета, а кратко по пристигнувањето ги испрати и првите фотографии од нејзината површина. Роверот слета во кратерот Jezero, а досега од НАСА споделија само две фотографии.

Фотографиите се црно-бели и со полош квалитет, но само затоа што се направени со камерите кои служат за навигација на роверот, а и бидејќи од нив уште не е тргната заштитната обвивка.

На првата испратена фотографија, покрај површината на Марс, се гледа и дел од сенката на роверот.

Од НАСА велат дека наскоро можеме да очекуваме уште фотографии со многу подобар квалитет.

Роверот кој тежи околу 1.000 килограми и е голем колку автомобил, неколку недели ќе биде тестиран пред да започне неговото истражување на Марс. Како што велат од НАСА, роверот е геолог и астробиолог, опремен да бара знаци од живот на Марс во поранешната делта на кратерот Jezero.

„Поради денешните возбудливи вести, сега сме еден чекор поблиску до тоа да вратиме примерок од друга планета на Земјата. Не знаеме што ќе ни кажат овие примероци од Марс. Но можат да ни кажат нешто многу големо – вклучувајќи го и тоа дека некогаш, животот постоел и надвор од Земјата“, изјави Томас Зубрухен, еден од научниците во НАСА.

Спирова С. | Црнобело