Лекари откриле рак на дојка кај жена 4 години пред да се развие, со помош на вештачка интелигенција

„Вештачката интелигенција ги гледа местата што лекарите не се во можност да ги видат и го открива ризикот од развој на рак“ – велат лекарите вклучени во програмата во којашто се користи вештачка интелигенција за рано откривање на рак на дојка.

Унгарските лекари користат вештачка интелигенција за да откријат рак на дојка четири години пред болеста да се развие.

Процесот се нарекува детектирање со компјутерска помош, а со помош на вештачка интелигенција на мамограмите може да се забележат местата каде постои ризик да се развие рак.

Според пишувањата во некои од светските медиуми, тимот лекари забележале дека на истите места што биле одбележани од компјутерот, неколку години подоцна кај пациентите се развивал рак.

Така кај една пациентка бил откриен рак 4 години пред да се развие.

Станува збор за места што не можат да бидат откриени од лекарите, а по нивното рано откривање медицинските лица утврдуваат кои дополнителни тестови треба да се направат за пациентите да обезбедат потребна превенција од натамошно развивање на болеста.

„Оваа технологија може да погледне подобро на мамограмите и да ги идентификува неправилностите во одредени делови што лекарите би сакале да ги испитаат подетално.

Ова се нарекува детектирање со компјутерска поддршка и за првпат почна да се применува во 90-тите години, но технологијата се подобрува.

Постојат голем број промени што ги гледаме. Има промени што не се тумори. Не можете на секој пациент што направил мамограм дополнително да му направите и биопсија.

Оваа технологија им помага на пациентите да го откријат ризикот“ – вели докторот Лари Нортон за CNN.

Унгарија како земја има напредна програма за тестирање на рак на дојка врз пациентите, а годишно се спроведуваат околу 35.000 тестирања.

Во 2021-ва година лекарите почнале да користат системи за вештачка интелигенција со цел да добијат колку е можно поточни резултати во редовните прегледи и да им се помогне на пациентите да ја превенираат појавата на оваа болест.

Освен во Унгарија, вештачка интелигенција во ваквите испитувања се користи и во САД, Британија и повеќе земји од Европската Унија.

Голем број жени коишто се соочиле со вакви тестирања коментираат на социјалните мрежи и велат дека благодарение на вештачката интелигенција успеале да го победат ракот во многу рана фаза.

„Вештачката интелигенција ми го спаси животот. Го откри ракот во првата фаза пред 3 години, па можевме веднаш да го отстраниме со операција. Без зрачење и хемотерапија“;

„Редовно правам целосни прегледи на телото, заедно со прегледи со вештачка интелигенција“ – стои во некои од коментарите.

 Б. С. Б. | Црнобело