Синдром на жив мртовец и уште 11 чудни медицински случаи со кои се соочиле лекарите

„Во психијатриската болница каде што работам, имаше пациентка со таканаречена фантомска бременост – мислеше дека е бремена, дури имаше и симптоми“.

Човечкото тело е една од најкомплексните работи што постојат.

Секоја секунда, во телото се одвиваат милиони процеси и реакции, сè со цел да можеме да функционираме.

Па, не изненадува фактот дека ни најголемите експерти не знаат многу работи за нашиот организам и немаат видено сè.

На Редит, неколку медицински работници ги споделуваат најчудните и најретките случаи што ги виделе:

„Најреткиот случај што сум го видел е кај пациент со епилепсија која се активира кога е исплашен. Пациентот имаше напади на секаков ненадеен физички стимул, како некој случајно да го допре. Беше страшно, имаше и по 10 напади дневно“.

„Не сум доктор, но се сеќавам дека мој пријател ми покажа рендгенска снимка од матката на неговата мајка. Откако ѝ направил царски рез, хирургот некако заборавил ножици внатре и ја зашил“.

„Таканаречена хистерична или фантомска бременост. Работам во психијатриска болница каде што имаше пациентка која мислеше дека е бремена и дури имаше и симптоми на бременост“.

„Имам видено пациентка со болест позната како Gorham’s Disease – многу ретко нарушување поради кое исчезнува дел од черепот. На пациентката ѝ направија операција со која ѝ ставија пластична облога за да ѝ го заштитат мозокот“.

„Кога бев студент, работевме на труп со прогресивна осифирачка фибродисплазија – болест поради која мекото ткиво се претвора во коска. Низ целиот труп имаше коски, не само како дел од скелетот“.

„Синдром на жив мртовец. Во 17-годишната кариера, го имам видено само еднаш. Лицата со ова нарушување мислат дека се мртви – пациентот што го видов јас беше сигурен дека е зомби“.

„Јас сум дерматолог – една од поинтересните болести што сум ги видел е хромидроза, состојба кога потта од телото има некаква боја. Мојот пациент, конкретно, имаше сина пот“.

„Имав пациент кој беше алергичен на вода“.

„Имам видено пациент со скорбут – целосен недостаток на витамин Ц во организмот. Беше постар маж и откако починала неговата сопруга, јадел само бисквити. Беше тажно“.

„Имам видено мувла која расте на мозочно ткиво, од пациент со компромитиран имунитет. За жал, пациентот почина“.

„Бев рендгенски техничар пред многу години, кога дојде една жена со болка во стапалото. Претпоставував дека го истегнала, како многу пациенти претходно. Но, кога ја направив снимката, видов игла за шиење во нејзината пета. Жената не се сеќавала кога ја згазнала“.

„Работам како анестезиолог. Неодамна колега ми покажа снимка од пациент со два сета гласни жици, едни до други. Многу бизарно“.

Спирова С. | Црнобело