Три божиќни книги кои ќе ве расположат во празничните денови

Замислете си ја следнава идилична слика - надвор студи и врне снег, а вие сте дома, под меко ќебе, со топло кафе во раката, читате убава книга... Исто како во божиќен филм. 

За љубителите на пишаниот збор, овој пат имаме три-предлог книги со божиќна тема, кои, веруваме, ќе ве опуштат и расположат во празничните денови.

Дури и да немате многу време за читање, ако почнете една од овие книги, нема да сакате да ја оставите додека не ја прочитате и последната страница.

Што да читате за празниците?

„Божиќна романса“ - Катрин Волш

Моли и Ендру се долгогодишни пријатели кои се обидуваат да стигнат дома во Ирска за Божиќ. Но, поради страшно невреме, летот им е откажан.

Помеѓу Моли и Ендру никогаш не се случило ништо романтично.

Но, еднаш годишно, во последните 10 години, тие поминуваат 7 часови и 15 минути заедно, додека седат еден покрај друг на летот од Чикаго за Даблин.

Моли не сака Божиќ, Ендру го обожава.

Па и покрај сите разлики што ги делат, Божиќ во Ирска со семејството е традиција од која ниеден од нив не сака да се откаже.

Затоа, Моли почнува да кова планови како да го одведе Ендру дома и да стигне на време за божиќната вечера со мајка му.

На патот кој ги води од САД до Ирска, иако се сигурни дека не им е судено да бидат заедно, Моли и Ендру почнуваат да се гледаат со други очи. Можеби вселенета за нив има други планови?

„Божиќен камп“ - Карен Шалер

Хејли Хенсон го мрази Божиќ. За неа идеален Божиќ е оној поминат на Карибите, без сите традиционални обичаи и настани.

Таа со години го жртвува личниот живот додека се искачува на сè повисоки позиции во престижна рекламна агенција во Бостон.

А бидејќи сака да стане партнер во фирмата, мора да склучи голем договор со компанија која произведува божиќни играчки.

Нејзиниот шеф смета дека Хејли треба да си го смени ставот кон празникот и затоа ја праќа во Божиќниот камп, место кое треба да ѝ помогне да го прифати празничниот дух.

А во кампот, Хејли го запознава Џеф, згодниот син на сопственикот. Меѓу нив се раѓа привлечност, но Хејли пробува да се фокусира само на работата.

Но, откако ќе се опушти, таа и Џеф почнуваат да се зближуваат, сè до оној момент кога Џеф ќе дознае дека Хејли смислила план како да му помогне на неговиот татко да го спаси кампот кој има парични проблеми, а кој Џеф сака да го продаде.

„Венчавка во Божиќниот камп“ - Карен Шалер

Оваа книга е продолжение на „Божиќен камп“.

Хејли Хенсон конечно станува партнер во рекламната агенција, па едвај наоѓа време да ја испланира венчавката со Џеф, која треба да се случи на Бадник.

Нивната совршена локација пропаѓа во последен миг, така што тие мора да бараат друго место за свадбата.

А бидејќи се празници, секаде е преполно и резервирано.

Затоа на Хејли и Џеф им останува местото каде што се запознале – во Божиќниот камп.

Одморалиштето брзо се претвора во зимска бајка, а напомош доаѓа Триша, жена која работи како планер на свадби, а која му е поранешна девојка на Џеф.

Минатото меѓу Џеф и Триша се заканува дека ќе ѝ застане на патот на среќата на Хејли...

А. Ј. | Црнобело