Зошто ви се јавува остра болка од страната на стомакот кога вежбате (и како да ја спречите)?

Постојат неколку теории за појавата на оваа болка – од мала физичка кондиција, до проблеми со дијафрагмата. А, за да ја спречите, препорачливо е да избегнувате мрсна храна и засладени пијалаци пред вежбање.

Веројатно нема личност која не ја почувствувала острата болка под реброто која некогаш се јавува при трчање или понапорен тренинг.

Ова може да им се случи и на луѓе кои имаат добра кондиција, а некогаш болката е толку интензивна, што се чини дека го попречува и дишењето.

Иако болката не е знак за никаков сериозен проблем, сепак е непријатна и може да ви го расипе целиот тренинг.

Па, зошто се јавува оваа болка, но и дали можете да ја спречите?

Кога и зошто се јавува болката?

Интересно е што иако ова појава е честа, експертите не се потполно сигурни што ја предизвикува.

Но, постојат неколку теории кои (можеби) ја објаснуваат.

Со децении, научниците и спортските лекари верувале дека болката е предизвикана од недоволен доток на крв во дијафрагмата.

Дијафрагмата се наоѓа веднаш под ребрата, а кога не добива доволно крв, може да се згрчи и да предизвика болка.

Оваа теорија се прославила во 1940-тите, но најверојатно не е точна.

Експертите велат дека кога вежбаме, дотокот на крв до дијафрагмата се зголемува. Што значи, мала е веројатноста дека болката е поради недоволно крв.

Друга популарна теорија е дека болката е поради мала физичка кондиција.

Односно, ако не сте вежбале долго време, и одеднаш почнете со интензивен тренинг, се создава напор на органите во областа на стомакот, па се јавува болка.

Сепак, проблемот со оваа теорија е тоа што болката им се јавува дури и на професионални спортисти.

Постојат и други претпоставки – дека болката е предизвикана од намален доток на крв во цревата за време на вежбање, или дека е поради компресија на нервите.

Според теоријата која денес е најшироко прифатена, главниот виновник за болката е мембрана позната како перитонеум.

Оваа мембрана, или обвивка, служи како заштита за органите во стомакот и има два слоја.

Според истражување од 2000 година, за време на интензивен тренинг, двата слоја на мембраната се тријат еден од друг и со тоа предизвикуваат иритација.

Оваа теорија е поткрепена и од фактот дека болката почесто се јавува ако сте јаделе или пиеле пред да вежбате.

Ако стомакот ви е полн, создава дополнителен притисок на мембраната, па го зголемува ризикот од болка.

Дали можете да ја спречите болката?

Веќе спомнавме дека болката е поверојатно да се појави ако јадете или пиете пред вежбање.

Истражување од 2004-та, пак, покажало дека овошните сокови и пијалаците со многу шеќер значително ги зголемуваат ризикот од појава на болката.

Што значи, за да ја избегнете болката, избегнувајте да јадете веднаш пред вежбање.

Препорачливо е да поминат 60-тина минути од оброкот пред да почнете со вежбање.

Исто така, оброкот пред вежбање нека биде помал и со помалку масти или хранливи влакна.

Доколку јадете храна со повеќе масти или хранливи влакна, тогаш почекајте барем 90 минути пред да почнете со вежбање.

Кога треба да одите на лекар?

Веќе спомнавме дека болката не е знак за ништо сериозно.

Но, важно е и да можете да препознаете дали станува збор за оваа болка.

Ако ја чувствувате болката на едната страна од стомакот додека вежбате и ако се намалува и целосно прекинува кога ќе престанете со вежбање, тогаш не мора да се грижите.

Но, ако интензитетот на болката не се намалува или болката не престанува целосно, дури и по одмор, тогаш одете на лекар.

Исто така, консултирајте се со експерт и ако покрај стомакот, чувствувате и болка во градите или друг дел од телото.

Во тој случај, можно е да станува збор за некаков здравствен проблем.

Спирова С. | Црнобело