Вртоглавица: Што ја предизвикува и дали може да се спречи?

Вртоглавицата не е болест, туку симптом кој може да биде предизвикан од низа проблеми со здравјето. Затоа, важно е да се консултирате со лекар ако често имате вртоглавици.

Вертиго или вртоглавица е еден од најчестите симптоми поради кои луѓето бараат помош од лекар. Вртоглавицата може да биде симптом за низа болести и состојби.

Најчесто се јавува кај луѓе кои имаат проблеми со внатрешното уво, мозокот или сензорните нервни патишта.

Ги погодува луѓето на сите возрасти, но најчесто постарите од 65 години.

Што е вертиго или вртоглавица?

Вртоглавицата е нарушување на ориентацијата во просторот, која се манифестира со силна илузија на движење во просторот.

Вртоглавицата не е болест, туку симптом (најчесто на хронични болести).

Многу состојби и болести може да предизвикаат вртоглавици и затоа ако често го имате овој проблем, најдобро е да се консултирате со лекар кој ќе може да ја утврди точната причина.

Некогаш вртоглавицата не е знак за сериозен проблем и доколку не е интензивна, трае неколку секунди и не се повтори, не би требало да бидете загрижени.

Кои се симптомите?

Покрај очигледната вртоглавица, оваа појава неретко е придружена и со други симптоми.

Дел од нив вклучуваат:

• проблеми со рамнотежата;
• мачнина и повраќање;
• зуење во ушите;
• чувство на затнати уши;
• главоболка;
• нистагмус, неконтролирањно движење на очите.

Колку долго трае?

Времетраењето на симптомот зависи од основната причина која ви предизвикува вртоглавици.

Вртоглавицата може да трае само неколку секунди, а во посериозни случаи може да ја чувствувате и неколку дена, па и недели.

Причинители

Многу состојби и болести може да доведат до вртоглавици, но најчесто тоа е нерамнотежа во внатрешното уво или проблеми со централниот нервен систем.

Некои од состојбите кои може да предизвикаат вртоглавици:

• мигренозна главоболка;
• повреди на главата;
• операција на увото;
• херпес зостер;
• отосклероза (абнормален раст на коските со средното);
• сифилис;
• атаксија
• мозочен удар;
• болест на малиот мозок или мозочното стебло;
• акустичен невром (бениген израсток кој се развива во близина на внатрешното уво);
• мултипла склероза.

Дали вртоглавицата е наследна?

Самата вртоглавица не е нужно наследна. 

Таа може да биде симптом на разни наследни болести и синдроми.

Лекување

Некои типови на вртоглавица исчезнуваат сами од себе, но доколку станува збор за хронична болест, лекувањето ќе биде неопходно.

Самата терапија ќе зависи од причината за појава на вртоглавица.

Докторите најчесто препишуваат антибиотици за бактериска инфекција или антивирусни лекови за херпес зостер.

Постојат и лекови кои можат да ублажат одредени симптоми.

Дополнително, можете да ја ублажите вртоглавицата на следниве начини:

- лежете во тивка, затемнета соба;

- седнете веднаш штом ќе почувствувате вртоглавица;

- секогаш кога ќе сакате да станете, да гледате нагоре или да ја свртите главата, избегнувајте нагли движења;

- наместо да се наведнувате за да кренете нешто од земја, подобро клекнете;

- спијте со повисоко поставена глава (на две или повеќе перници).

Но, овие совети нема да го излечат причинителот, што значи мора да одите на лекар доколку вртоглавицата ви се повтори или трае подолго од неколку секунди.

С. Ш. | Црнобело