Популарни митови за нега на кожа од Инстаграм и ТикТок (кои можат да бидат и штетни)

Не ви требаат 10 продукти за нега на кожа и ако некој продукт ви предизвикува иритација, кожата нема да се навикне на него и треба да престанете да го користите.

Благодарение на ТикТок и Инстаграм, постојано сме бомбардирани со совети за нега на кожа.

Точно е дека постојат дерматолози кои ја користат платформата и споделуваат релевантни совети, но доста често се шират и само митови.

А, овие митови некогаш можат да бидат и штетни.

Вo продолжение, дел од најчестите митови за нега на кожа од социјалните мрежи:

Мит 1: Треба да чувствувате дека кожата ви е чиста

Во овој случај станува збор за чувството откако темелно ќе го исчистите лицето и чувствувате како кожата да ви е малку затегната.

Но, штом чувствувате затегнатост, па и сувост, ова може да значи дека претерувате со продуктите за чистење.

На микроскопско ниво, кожата има липиди – органски соединенија кои делуваат како нејзина заштита.

Овие липиди се важни за структурата на кожата, ја одржуваат нејзината флора, но и ја штитат од потенцијални иритации и воспаленија.

Ако користите многу силни продукти за чистење, вие ја отстранувате природната заштита на кожата и ја правите посклона кон проблеми.

За чистење на лицето треба да користите понежни продукти соодветни за вашиот тип кожа.

Мит 2: Кожата се навикнува на продуктите

Сигурно имате слушнато дека ако забележувате црвенило, чешање и слично поради некој продукт, треба да ѝ дадете време на кожата да се навикне.

Ова не е точно и штом некој продукт ви создава каква било иритација, треба да престанете да го користите.

За некои посилни продукти, како ретинол, препорачливо е на почетокот да не ги користите секој ден, туку да ги воведувате постепено.

Но, ако забележувате иритации, кожата нема да се навикне, туку само ќе си предизвикате штета.

Мит 3: Треба да ги „исушите“ мозолчињата и акните

Точни е дека мрсната кожа е посклона кон акни и мозолчиња.

Но, ова не значи дека треба да користите продукти кои ви ја сушат кожата за да се ослободите од нив.

За акните најдобро да се консултирате со експерт бидејќи постојат разни причини за нивна појава, како хормонална нерамнотежа.

Мозолчињата, пак, се честа појава кај жените во време на ПМС, а можат да се појават и ако не ја чистите шминката навечер или користите продукти кои не ѝ годат на вашата кожа.

Мит 4: Не треба да користите ретинол во лето

Бидејќи ретинолот го поттикнува обновувањето на кожните клетки, може да ја направи кожата почувствителна на сонце.

Но, ова не мора да е причина да го прескокнувате во лето - можете да го нанесувате навечер.

Ако сакате да го нанесувате наутро, тогаш задолжително нанесете и крем со фактор пред да излезете надвор.

Продолжува на следната страница...