Мајки од Македонија откриваат за CRNOBELO: „Кој ни ги чува бебињата по породилното - баби, дадилки или градинка?

Градинка да, дадилка никако

Ивана Момироска Таневска е мајка на петгодишниот Матео и тригодишната Теона и двајцата посетуваат градинка.

Со нејзиниот сопруг се одлучиле за градинка поради нивните работни места и работно време од 7.30 до 15.30 часот и во тоа време и двете деца се во градинката „Сонце“, објект под „ЈУДГ Бубамара“ во општина Аеродром. Месечно плаќаат во 1.490 денари за секое дете, и во тоа е вклучено појадок, ручек и две ужинки.

„Дефинитивно, да - за градинка. Со баба во случаи кога детето е настинато, дадилка никако“ – вели оваа млада мајка, која додава дека приспособувањето во градинка во првата недела е тешко.

„Детето треба да навикне на нова средина, во која треба да дели играчки со повеќе од 25-30 деца, на негувателки, на нови работи“ – појаснува таа, додавајќи дека Теона почнала во градинка со само десет месеци, а Матео со две и пол години, поради епидемијата.

Таа појаснува дека децата се задоволни и среќни во градинката, поборбени и несебични.

„Баба кај нас ги чува децата само кога се настинати и не можат да одат во градинка“ – вели Ивана, потенцирајќи дека нема храброст да ги остави своите деца со дадилка.

Дадилка само со препорака

За Магдалена Ѓошевска, мајка на двегодишен син, ангажирањето на дадилка е одлично и практично искуство. Таа појаснува дека работи од дома, па затоа многу повеќе ѝ одговарало, жена да доаѓа кај нив дома и да го чува нејзиниот син, отколку да го носи во градинка.

„Препораката беше клучниот момент кој ни помогна да одбереме дадилка за мојот син“ – вели Магдалена и додава дека им препорачува на мајките кои наскоро ќе се вратат на работа да размислат за оваа опција.

„Мојот син брзо се навикна на неа и ја засака“ – додава таа, појаснувајќи дека е навистина задоволна и дека за оние родители кои се размислуваат меѓу дадилка и градинка, таа препорачува дадилка.

На прашањето дали планира да го прати во градинка, таа вели дека не ја исклучува таа можност, но сака прво синот да порасне малку и да изгради имунитет.

Продолжува на следната страница...