Позитива на денот: Стружанец спасил мало повредено мече на пат од Радожда кон Струга (фото+видео)

Гоце Митрески од Струга нашол мало повредено и дехидрирано мече на патот Радожда-Струга и веднаш го зел со себе за да го однесе на ветеринар. Според „Глас на Америка“, на мечето му била пружена потребната помош и сега е згрижено кај стружанецот.

Според медиумот Глас на Америка, вчера стружанец спасил мало мече кое го нашол на пат од селото Радожда кон Струга.

Стружанецот Гоце Митрески го нашол малото мече повредено и дехидрирано, па веднаш ја покажал својата хуманост – го зел со себе и го однел на преглед во ветеринарна амбуланта.

Во амбулантата мечето било прегледано и третирано, а моментално се наоѓа кај Гоце. Од ветеринарот тој добил препораки како да се грижи за него додека мечето да закрепне и може да биде пуштено назад во природата.

За Глас на Америка, Гоце вели дека веднаш ја известил полицијата и ловното друштво во Струга.

„Мечето тешко се движи и во моментот го имам згрижено во мојот дом, сè до негов транспорт на соодветно место. Барам начин во соодветна здравствена институција да му биде направен преглед, односно скенер на главата.

Во контакт сум и со надлежни државни институции за понатамошен негов третман“, гласи неговата изјава.

Глас на Америка ја сподели приказната на својот официјален Фејсбук профил, а набрзо потоа беше објавено и видео на кое слаткото мече жедно пие вода во амбулантата.

Во коментарите на двете објави, Фејсбук корисниците го искажуваат својот восхит за добрината на Гоце.

Спирова С. | Црнобело

фото: Глас на Америка