Заглавените астронаути се враќаат на Земјата по 9 месеци – капсулата пристигна на Меѓународната вселенска станица

Детали

понеделник, 17 март 2025

Синоќа (16.03) капсулата што треба да ги врати астронаутите Сунита Вилијамс и Бери Вилмор пристигна на Меѓународната вселенска станица и ако сè оди според планот, тие ќе бидат дома на 19-ти март.

По девет месеци на Меѓународната вселенска станица, астронаутите Сунита (Суни) Вилијамс и Бери (Буч) Вилмор ќе се вратат дома.

Мисијата која требаше да трае само неколку денови се претвори во еден од подолгите престои на Станицата, откако капсулата која требаше да ги врати назад имаше дефект.

Неколку месеци наназад се знаеше дека ќе се вратат во март, но неизвесноста околу точниот датум само се зголемуваше бидејќи пред лансирањето имаше технички проблеми.

Имено, минатиот четврток (13.03) лансирањето на ракетата на SpaceX беше одложено и не беше сигурно кога ќе има поволни временски услови за да се повтори лансирањето.

Сепак, веќе следниот ден имаше добри временски услови, па ракетата беше лансирана во петокот (14.03).

Синоќа, капсулата Crew Dragon пристигна на Меѓународната вселенска станица и ако сè оди според планот, астронаутите ќе бидат дома на 19-ти март.

Додека траеше непланирано долгата мисија на Сунита Вилијамс и Бери Вилмор, НАСА се соочуваше со критики и целата ситуација доби и политички пресврт.

Од НАСА главно известуваа за состојбата на астронаутите, но не откриваа зошто ја одложуваат спасувачката мисија.

Погледнете и: Загриженост за здравјето на астронаутите заглавени на Меѓународната вселенска станица – враќањето се одложи за март

Сега, пак, од Агенцијата открија дека главен фактор бил и нивниот буџет, односно немале доволно пари.

Илон Маск, кој е сопственик на SpaceX тврдеше дека додека траеше претседателскиот мандат на Бајден, тој му понудил план за спасување, но претседателот го одбил од политички причини.

Но, од НАСА велат дека нема никаква политика зад одложувањето.

Што се однесува до астронаутите, тие немаат дадено свое мислење за целата ситуација.

Но, веќе се шпекулира дека ќе добијат паричен надомест, иако не многу голем.

Според американските медиуми, Сунита и Бери ќе бидат третирани како да биле на долго деловно патување.

Астронаутите на НАСА имаат фиксна плата кога се во вселената.

Но, според некои извори, тие добиваат околу четири долари дневно ако се соочат со некаков проблем.

Бидејќи Сунита и Бери останаа во вселената околу 300 дена, веројатно ќе добијат околу 1.100 екстра.

Но, како астронаути, тие имаат и бројни други бенефиции.

Од НАСА добиваат пари за домување, а можат и да изнајмуваат автомобили во име на Агенцијата.

Исто така, имаат одлично здравствено осигурување.

Погледнете и: Не смеат да се тушираат – Како изгледа животот на астронаутите кои се „заглавени“ во вселената до 2025-та?

Спирова С. | Црнобело