Измамник изнудил 800.000 евра од Французинка – ја лажел дека е Бред Пит и дека му требаат пари за операција

Детали

среда, 15 јануари 2025

Жена од Франција била убедена дека се допишува со Бред Пит и дека му дава пари за операција бидејќи измамникот ѝ праќал фотографии и видеа од актерот направени со вештачка интелигенција. Во текот на нешто повеќе од една година, тој изнудил скоро милион евра од неа.

Французинка била жртва на онлајн измама, откако измамник ѝ се претставувал како актерот Бред Пит и од неа успеал да изнуди над 800.000 евра.

53-годишната жена верувала дека актерот има рак и дека со парите му го плаќа лекувањето.

Измамникот користел видеа и фотографии направени со помош на вештачка интелигенција, што, пак, било доволно да ја убеди жената дека сепак е во контакт со познатиот актер.

Според француските медиуми, најпрво жената била контактирана на Инстаграм од друга жена, која ѝ се претставила како мајката на Бред Пит.

Следниот ден, добила порака од друг Инстаграм профил, а корисникот ѝ се претставил како актерот.

Тој период, жртвата на измамата била во брак (со сопруг милионер), но бидејќи имале проблеми, продолжила да комуницира со „Бред Пит“.

Во изјава за француски медиум, таа вели дека сè почнало во февруари 2023-та, а набрзо се зближиле и редовно се допишувале.

„Малку се мажите кои пишуваат такви пораки.

Ми се допаѓаше мажот со којшто се допишував. Знаеше како да разговара со жени“.

Жената истакнува дека на почетокот се сомневала дека профилот е лажен, но поради фотографиите и видеа направени со помош на вештачка интелигенција, поверувала дека профилот навистина е на актерот.

По некое време, измамникот почнал да ѝ ветува разни луксузни подароци.

Единствено, ѝ рекол, дека ќе мора самата да плати за царина и достава.

Тој ѝ кажал каде да ги уплаќа парите и на овој начин измамникот успеал да изнуди околу 9.000 евра од неа.

Потоа жената му кажала на измамникот дека има проблеми во бракот, а откако се развела, на измамникот му открила дека очекува да добие голема сума од разводот.

Па, измамникот почнал да бара повеќе.

Ѝ рекол дека му треба итен медицински третман за рак на бубрегот, но дека немал пари поради тековниот развод со Анџелина Џоли.

Измамникот продолжил да испраќа и фотографии направени со вештачка интелигенција на кои се гледа актерот во болница.

Жената му праќала пари за лекување и стигнала до сума од над 800.000 евра.

Веројатно измамата ќе потраела, но жената видела фотографии од Бред Пит и неговата девојка Инес де Рамон.

И, вели, тогаш сфатила дека нешто не е во ред, па веднаш го пријавила случајот.

Истрагата уште трае, а според француските медиуми, жената моментално е во депресија за што добива и третман.

Жената се соочи со критики поради нејзината наивност, но многумина ѝ покажуваат сочувство.

„Најсурови се измамите каде што некој мисли дека е во врска“.

„Тажно е што ова им се случува на повозрасните луѓе. Не им е јасно како функционира модерната технологија“.

„Поради ова е важно да проверувате што прават вашите родители онлајн“.

Не е познато дали жената успеала да врати барем дел од парите што му ги дала на измамникот, а не се знае ни дали полицијата го фатила.

Спирова С. | Црнобело