100-годишник се ожени со својата 102-годишна девојка - се запознале во старечки дом

Детали

среда, 29 мај 2024

Берни Литман и Марџори Фитерман се запознале на забава под маски, а првиот состанок го имале на денот кога се родила првата правнука на Берни.

Берни Литман (100) и неговата две години постара девојка, 102-годишната Марџори Фитерман, се венчаа во старечки дом во Филаделфија, една деценија откако првпат се запознале.

Парот заедно има 202 години, со што го сруши Гинисовиот рекорд. Претходниот рекорд во Гинис го држеле Дорин и Џорџ Кирби од Англија кои заедно имале 194 години кога се венчале на 13 јуни 2015 година.

На венчавката на Берни и Марџори присуствувале нивните семејства, кои биле среќни што и во толку доцна доба, на нивните најсакани им се случила љубов.

„Баба ми и Берни се среќни што се најдоа еден со друг и што ќе имаат некој со кого ќе можат да ги поминуваат деновите.

Тие си беа голема поддршка еден на друг во времето на пандемијата“, открива внуката на Марџори за локалните медиуми.

Марџори претходно била мажена еднаш, а нејзиниот сопруг Морис починал во 1999 година.

Пред бракот со Марџори, Берни бил 65 години во брак со првата сопруга, но таа починала во 2012 година.

Неколку години подоцна, парот се запознал на забава под маски, а првиот состанок го имале на денот кога се родила првата правнука на Берни.

Семејството на Берни било изненадено од неговите планови да се венча на 100 години, но ја поддржале неговата одлука.

Интересно е што Берни и Марџори во исто време биле студенти на Универзитетот во Пенсилванија, но не се сеќаваат дека се запознале за време на студиите.

А. Ј. | Црнобело