Кортни и Тревис се откажуваат од ин-витро – ќе продолжат со „бизарни“ алтернативни методи за забременување

Детали

вторник, 13 септември 2022

„Тешко е да апстинираш од секс, но се надеваме дека ќе го добиеме тоа што го посакуваме“ – вели Кортни Кардашијан. Таа открива дека заедно со сопругот Тревис Баркер одлучиле целосно да се откажат од ин-витро оплодување и да се обидат само со алтернативни методи.

Најстарата од сестрите Кардашијан, Кортни (43) пред извесен период отворено зборуваше за својата борба со неплодноста и за методите што таа и нејзиниот сопруг Тревис Баркер (46) ги применуваат за да станат родители.

Сега, ријалити ѕвездата даде поголемо интервју за Wall Street Journal каде кажа дека одлучиле да престанат со постапката за ин-витро оплодување и наместо тоа вовела забрана за секс.

„Почнавме постапка за ин-витро оплодување, но се откажав. Притисокот беше преголем. Ми требаше да се одморам и да се сконцентрирам само на организација на свадбата и да се омажам“- рече таа.

Во мај годинава, Кортни и Тревис беа во фокусот на вниманието кога во една од епизодите на реалното шоу The Kardashians покажаа дека одлучиле да се обидат со ајурведско „Панчакарма“ прочистување со цел да ги зголемат можностите за добивање здрав ембрион.

Кортни тогаш покажа како изгледа процесот на т.н. „јони-пареа“ или вагинална пареа, за време на кој седеше гола врз сад во кој има врела вода со билки, а според повеќе медицински лица овој третман може да биде опасен и да нанесе поголема штета, особено доколку жената е веќе бремена.

Сега, Кортни вели дека со Тревис одлучиле годинава повторно да се обидат со вакво прочистување.

„Можеби веќе сте го виделе во нашето реално шоу. Тоа подразбира апстинирање од повеќе работи: нема секс, нема кафе, нема алкохол, нема шеќери.

Мора да држите чиста, стриктна диета и тоа трае околу пет дена.

Целта е да го ресетирате телото. Го правите сето тоа за да ги прочистите токсините од вашите ткива. Потоа одите во спа-центарот и имате секојдневни 4-часовни третмани“ – појаснува Кортни.

На прашањето дали ѝ паѓа тешко да апстинира од секс, Кортни вели:

„Да, тешко е. Но, затоа резултатите од друга страна – можеби ќе го добијам тоа што го посакувам, нели?“

Инаку, за потсетување Кортни веќе има 3 деца од врската со Скот Дисик, а Тревис има две деца од претходниот брак со Шана Моаклер.

Прочитајте и Вагинална пареа, пиење семена течност – Кортни и Тревис со „бизарни“ методи за забременување, по неуспешното ин-витро (фото)

Б. С. Б. | Црнобело