Трилер, љубов или мистерија? 3 одлични наслови за сечиј вкус

Доколку немате идеја што да прочитате наредно, ви предлагаме 3 сосема различни книги според сопствените читателски преференци. Трилер, љубовна приказна или приказна исполнета со мистерија?

Изборот останува на вас:

Во мракот - Карин Фосум

Додека Ева и нејзината ќеркичка шетаат покрај реката, на површината испливува машки труп. Ева трча да ја извести полицијата, но ѕвони на сосема друго место.

Во меѓувреме, инспекторот Конрад Сејер и неговиот тим откриваат дека жртвата Егил умрел од насилна смрт, а претходно се водел како исчезнато лице со месеци.

Овој случај се вкрстува со уште еден необичен – убиството на проститутка кое се случило неколку дена пред да исчезне Егил.

Инспекторот Сејер започнува да ги поврзува коцките од мозаикот, додека Ева добива неочекуван повик од туѓинец доцна во ноќта. Тој нагло го прекинува повикот, а Ева останува сама во мракот.

Ти не знаеш да сакаш - Сузан Е. Филипс

Таткото на Дејзи ѝ соопштува дека мора да се омажи за човек кој никогаш не го видела во животот. За современо општество како денешното, договорениот брак звучи како некоја лоша шега, но набрзо Дејзи дознава дека бракот ќе се оствари по секоја цена.

Таа мора да се омажи за Александар Марков, намуртен, здрвен, здодевен Русин. Втората опција е да заврши во затвор поради огромните наследени долгови од мртвата мајка.

Александар е должник на таткото на Дејзи и се согласува да се ожени со неа, но нема намера да ѝ угодува на Дејзи. Тој смета дека таа е обична разгалена глупава богаташка.

Дали Дејзи ќе успее да преживее во неговиот свет?

Венецијанското предавство - Стив Бери

Огромни пожари се случуваат на повеќе локации, проголтувајќи цели зданија низ Европа. Поранешните советски републики се обединуваат во нова Централно Азиска Федерација, на чие чело стои итрата и талентирана Ирина Зовастина.

Таа е опседната со желбата да го надмине Александар Велики и да стане најмоќниот освојувач во историјата на човештвото.

Котон одвај успеал да се спаси од еден таков пожар во музеј во Данска. Од својата пријателка Касиопеја тој дознава дека пожарот не е случајност, ниту изолиран случај.

Котон и Касиопеја се здружуваат со цел да ги сопрат сојузничките сили во нивниот пеколен план. Авантурата ги води повторно во Данска, Венеција и високо на Памир во Централна Азија со цел да ја решат загатката која може да спаси или уништи милиони животи.

(О)Милена | Црнобело