Флоберовиот папагал - Омилената книга на Дејвид Боуви

Литературна критика? Детективски роман? Збирка есеи? Биографска фикција? Документаристички роман? Флоберовиот папагал е книга што тешко може жанровски да се одреди и во тоа лежи голем дел од задоволството што произлегува од читањето.

Игрива и авторична, со фино дозирана комбинација од несериозност и речиси манијакална посветеност на делото на големиот француски писател. Џулијан Барнс пишува роман чијашто основна цел е разгледувањеро на односот меѓу фактот и фикцијата.

Романот ја следи приказната за англискиот лекар Џефри Брејтвејт, кој е пасиониран аматерски истражувач на животот на Флобер. Брејтвејт пристигнува во Руан, родниот град на Флобер и набрзо читателот влегува во лавиринт од биографски податоци, важни и тривијални детали поврзани со Флобер необични согледувања на делото и животните ситуации на писателот.

Се пластат разнородни текстови што на прв поглед изгледаат како случајна неповрзана збирка. Барнс е уметник на повторувањето и варијацијата. Одредени цитати и фази се повторуваат во различни контексти, овозможувајќи му на читателот да ја извлече важноста на секој од нив, без да бидат здодевни или монотони. Тоа се случува и со мотивите и сликите што како рефрен се провлекуваат низ делото.

Сите елементи се преклопуваат за на крајот на специфичен начин да го добијат своето место во животот и делото на Флобер.

Така, авторот мајсторски ја сплетува својата мрежа и го уловува неуловливото - неповторливата комбинација од факт и фикција, од живот и творештво, од биографија што станува осмислена животна целина.

Книгата може да ја најдете во издавачката куќа Магор.