Книги кои ќе ви ја вратат вербата во човештвото

Подгответе се за доза позитивна инспирација која ќе ви го промени животот. Време е да го одморите мозокот од сите едноставни сладникави книги и да го заинтригирате малку повеќе. Воедно, малку надеж и многу оптимизам како нус-појави на читањето книги никогаш не се на одмет, зарем не?

Доколку сакате по читањето на книгата долго да размислувате или да водите дебата со себеси, задолжително одвојте време за следните три ремек-дела:

Да се убие птицата подбивница - Харпер Ли  

Ова генијално дебитантско дело на Харпер Ли ја раскажува приказната видена низ очите на 8-годишната Скаут Финч. Нејзиниот брат Џем и таткото Атикус се целиот нејзин свет сместен во Мејкомб, Алабама.

Во фокусот на приказната е судењето на млад црнец обвинет за силување на бела жена, а бранителот е токму нејзиниот татко. Ова е силен и истовремено неверојатно нежен роман за расната како и класната дискриминација, правдата и нејзиното изобличување и болката наречена созревање и растење.

Проткаен со болка и мистерија, но и доволно хумор и емпатија, ова е една вешто напишана книга која не сакате да ја пропуштите.

Славејот – Кристин Хана

Како да се преживее и љуби за време на војна? Колкава е храброста и издржливоста на жените кои се вплеткани во студениот суров виор на злосторства? Вијан и Изабел се две сестри кои живеат во мало француско селце. Вијан е кршлива и плашлива додека се збогува со својот сопруг кој оди да војува.

Изабел е целосна спротивност, бунтовна и храбра, која не знае како изгледа стравот. Таа се вљубува лудо и неконтролирано во Гејтон, мистериозен партизан и непромислено решава да се приклучи на тајни ослободувачки групи, без да размисли за опасностите и последиците.

Вторниците со Мори – Мич Елбом

Што кога личноста која извршила огромно позитивно влијание во вашиот живот ја среќавате години подоцна? Професорот Мори Шварц ги живее последните месеци, кога авторот повторно го сретнува.

Неговиот ментор е трпелив и мудар, а гладот и жедта за успех го натерале Мич да скршне од вистинскиот пат. Затоа тука се вторниците, резервирани за мудрите лекции на Мори. Оваа книга која е раскажана искрено и од срце, нé потсетува колку е кус животот и сé што е вистински скапоцено во него.

(O)Милена | Црнобело