Сите љубители на животни мора да ги прочитаат овие книги

Книгите во кои главниот лик е животинче несомнено се забавни и имаат поинаква атмосфера. Тие ја будат нашата емпатична страна и нé потсетуваат на онаа чиста форма на љубов.

Доколку ги сакате животните и имате милениче, едноставно мора да пронајдете малку време и да ги прочитате следните 4 книги:

Уличниот мачор Боб – Џејмс Бовен

Оваа вистинска приказна ќе ви го стопли срцето. Џејмс е поранешен зависник и одвај скрпува крај со крај како уличен музичар во Лондон. Но, еден ден во неговиот влез ќе се појави чудниот портокалов мачор кој одбива да замине.

Мачорот Боб и Џејмс ќе станат неразделни пријатели и ќе добијат втора шанса во животот. Оваа двојка е неверојатно славна, а книгата е веќе адаптирана и во филм.

Вода за слонови – Сара Груен

Маестралната „Вода за слонови“ е уште еден доказ колку животните можат да нé научат на сочуство, верност и љубов.

Сеќавањата на 93-годишнот Џејкоб кој во младоста работел во огромен циркуз сведочат за мајмунот Бобо, кученцето Квини и секако, слоницата Рози. Авантурите на животните испреплетени со човечките судбини, сето под магијата на циркускиот шатор, каде што се случува и љубовта.

И оваа книга има филмска верзија со Роберт Патинсон и Рис Витерспун во главните улоги.

Животинска фарма – Џорџ Орвел

Култната и незаменлива фарма на Орвел претставува интелигентна сатира напишана на сосема едноставен стил, но со длабока метафора. Како функционира пропагандата и перењето на мозокот за време на режими е најдобро прикажано со животните од фармата Мејнор, чија желба е да се ослободат од ропството и сите да бидат еднакви и да ги имаат истите права.

Но, слично како и во вистинскиот живот, не заборавајте – Сите животни се еднакви, но некои се поеднакви од другите.

Фантастичниот господин Лисец – Роалд Дал

Оваа детска книга останува една од најомилените на различни генерации. Фантастичниот господин Лисец ќе ископа неверојатна мрежа на подземен тунел со цел да го спаси своето семејство од смрт и глад, сладејќи се со вкусната храна од визбите на тројцата злобници кои живеат над неговото дувло.

(О)Милена | Црнобело