„Научете ги децата дека не треба да му се смеат на детето кое носи исти чевли секој ден“ - Наставник од Прилеп со моќна порака

Детали

понеделник, 22 јануари 2024

„Објаснете му на вашето дете дека малтретирањето боли и дека на училиште оди за да УЧИ, НЕ за да се натпреварува“ – вели во својата објава наставникот од Прилеп, Гоце Бумбароски, и уште еднаш ги поттикна родителите да разговараат со своите деца, затоа што воспитувањето започнува од дома.

Наставникот Гоце Бумбароски од прилепското основно училиште „Борка Талески“, пред почетокот на второто полугодие, на својот Фејсбук профил упати моќна порака до сите родители чиишто деца денес (22.01) повторно се вратија во училишните клупи.

Наставникот, кој е познат по тоа што јавно зборува за сите проблеми во образовниот процес и често коментира за начинот на којшто децата денес се однесуваат во училиште, во краток статус на социјалните мрежи, се потруди да им посочи на родителите на кои клучни работи треба да внимаваат и за што треба да разговараат со сопствените деца.

Во продолжение целиот статус на наставникот:

„Утре започнува второто полугодие.

Седнете со вашето дете и објаснете му дека да се биде многу високо, ниско, дебело, слабо не е причина за смеење…

Или дали ученикот носи очила или исти чевли секој ден.

Објаснете му на вашето дете дека стариот ранец ги носи истите соништа како и новиот.

Ве молам научете го вашето дете да не исклучува никого затоа што е сиромашен или 'различен'.

Објаснете му на вашето дете дека малтретирањето боли и дека на училиште оди за да УЧИ, НЕ за да се натпреварува.

Сите имаме еднаква вредност.

Воспитувањето започнува од дома!“

Б. С. Б. | Црнобело