Мали хероини: Уште 2 предвремено родени бебиња се изборија за животите (едното родено со тежина од 550g)

Детали

понеделник, 10 јуни 2024

Малата Амела била родена со тежина од само 550 грама во 6-иот месец од бременоста, а Амра се родила со тежина од 820 грама. Двете палчиња си заминаа од болница, во домот на нивните родители.

Убави вести од Универзитетската Клиника за гинекологија и акушерство во Скопје.

Уште две мали предвремено родени бебиња успеаја да се изборат за своите животи и да го напуштат Одделението за интензивна нега и терапија.

Амра и Амела се две мали „палчиња“ родени со екстремно мали телесни тежини, кои поминаа неколку месеци на ГАК, пред да си заминат дома.

Како што информираат од ГАК, Амела се родила на 29-ти ноември минатата година со телесна тежина од само 550 грама и во 25-тата гестациска недела, а по 156 дена престој и борба во болница, минатата недела конечно си замина дома, откако успеала да постигне тежина од 2.640 грама.

Амра е второто екстремно прематурче, кое на 8 Март годинава се родило со тежина од 820 грама.

По 80 дена поминати во болница и таа си заминува дома со тежина од 1.800 грама.

„На голема радост на сите нас, педијатри и медицински сестри акушерки, двете мали хероини се изборија со сè она што го носи предвременото раѓање.

Растете среќни и имајте детство исполнето со љубов и со здравје, уживајќи во прегратките на своите најблиски“ – им порачуваат од ГАК.

Б. С. Б. | Црнобело