Ивана Здравкова работи како оперска пејачка во Австрија: „Во песните од Дизни најдов надеж и магија за време на карантинот“
- Детали
- понеделник, 13 декември 2021
Учествувала на шоуто за таленти на Драган Вучиќ, студирала соло пеење, работи како оперска пејачка во Австрија, а снима кавери на песните од Дизни – поразговаравме со Ивана Здравковка, која со својот талент за пеење и ангелски глас ја освојува оперската публика во Австрија.
Оперската пејачка Ивана Здравкова (32) студирала соло-пеење во Грац, денес работи како оперска пејачка во Баден, Австрија, а слободното време по периодот на карантинот заради светската пандемија го користи за да снима видеа со нејзини интерпретации на песните од цртаните филмови на Дизни и ги објавува на нејзиниот YouTube канал.
Во разговор за CRNOBELO.com ни откри повеќе интересни детали за себеси, како преку учеството во шоуто за таленти „Мак Ѕвезди“ со Драган Вучиќ, учествувала на Радискиот фестивал во Охрид и како стигнала до вработување во Баден, во непосредна близина на Виена.
Како започна да се занимаваш со музика – дали отсекогаш сонуваше дека ќе пееш во опера и дали свириш и на некој инструмент?
Моите родители се оперски пејачи кои работат во МОБ и дејци на фолклорната и чалгиска сцена, така што кај нас дома секогаш се пеело и свирело разни стилови.
Дел од детството го поминав во Австралија, каде поблиска ми беше поп-музиката, па сонував да станам како мојот идол Бритни Спирс и балерина.
Дури во училишниот хор во Скопје ми се приближи оперското пеење и одлучив тоа да продолжам да го учам и студирам.
Учествуваше во шоуто за таленти „Мак Ѕвезди“ кај Драган Вучиќ, колку години имаше тогаш и дали тоа учество те охрабри понатаму да се занимаваш со музика?
Јас на шоуто имав 19 години, така што веќе бев на факултет по соло пеење. Но шоуто ми беше прекрасен начин да пеам различни стилови, а меѓу другото Драган Вучиќ и ми подари песна „Ден за нас“ од Младен Марковиќ и настап на Радискиот фестивал во Охрид, за што сум многу благодарна.
Како дојде до тоа денес да работиш во театарот Баден?
Во тој период се имав вратено од студии од Грац, во Македонија, со цел да останам. Но, некако надежите за вработување во МОБ беа многу мали и морав да најдам солуција.
Видов дека има отворен конкурс во Баден и се пријавив, несигурна дали воопшто би сакала повторно да живеам во Австрија. Но, диригентите на аудицијата беа одлучни дека само мене сакаат да ми дадат договор, па прифатив.
Дали лесно се навикна на животот во Баден – што најмногу ти се допаѓа, а што најмногу ти пречи таму?
Тоа што веќе сум живеела во Австрија имаше неколку предности, јазикот и познаниците и пријателите во блиската Виена.
Но, сепак, оддалеченоста од семејството и на почетокот чувството на осаменост доста преовладуваа.
Дали може да се живее од музика? Се заработува ли доволно за нормален живот со работата како оперска пејачка во Баден?
Да, се заработува доволно, но секогаш постои опасноста да се остане без ангажман, бидејќи не постои вработување за стално, така што никогаш не може еден уметник да се чувствува сигурен дека нема да остане без работа.
Кога не би била во Баден, каде би сакала да настапуваш?
Секогаш ми е мило да настапувам на македонската сцена, а инаку немам посебни желби каде да настапувам, во главно да можам да си ја работам професијата без разлика каде!
Освен што пееш во опера имаш и твој YouTube канал каде објавуваш песни од филмовите на Дизни, поп песни, македонски народни песни. Како дојде до идејата да објавуваш вакви видеа?
Тоа се случи спонтано во периодот кога Австрија се затвори и објави локдаун.
Јас во Дизни песните најдов надеж и магија која го подигнуваше расположението, па од потребата да продолжам со креативно творење, и покрај прекинот на работењето, решив да ги снимам тие песни, а воодушевувањето од страна на другите предизвика да продолжам со снимање на дизни песни.
Дали освен со опера, некогаш планираш да се обидеш и со некој друг жанр на музика? Дали размислуваш да почнеш да снимаш и популарна музика?
Всушност операта и оперетата се мојата професија, но ме исполнува кога пеам различни стилови, ја сакам народната музика, мјузиклите, поп музиката, старите џез стандарди кои многу звучат како Дизни песни.
Така што сигурно и понатаму ќе ги пеам сите тие стилови, на различни настани, а и поп песна би било дефинитивно една од можностите.
Погледнете неколку видеа од YouTube каналот на Ивана:
Б. С. Б. | Црнобело
Би можело да ве интересира:
Препорачуваме
Најчитани неделава
