NBK & Twister: Во Македонија младите немаат свој сон за содавање на уметност

Детали

сабота, 02 јуни 2018

Кумановските рапери чии секојдневни приказни се инспирација за нив и кои рапуваат на кумановски дијалект, подготвуваат нешто ново за својата публика.

NBK & Twister одвоија од нивното време и одговорија на неколку прашања. Во продолжение следува разговорот со нив.  

Постоите со години и добро сте вкоренети во македонската рап сцена, интересно е тоа што за неколку недели ќе го издадете вашиот нов студиски албум, насловен како Од подрум до бину. Може ли да позборуваме малку за создавање на новиот материјал, на какви сé препреки и олеснителни околности наидовте во изминатиот период?

Албумот е речиси готов, а самото создавањето течеше доста лесно, бидејќи секогаш работиме со наши блиски, луѓе со кои го делиме секојдневието. Со нив работиме на музиката, омотот, спотовите.

Без сомнение, од идејата до реализирање на делото секогаш  е полесно кога си опкружен со пријатели. Најголем проблем е на крајот, кога доаѓа време за промоција и концерти, а со тоа посебно се соочуваме во Куманово, каде нема културни центри и локали со бина.

Вашите песни обработуваат теми што нé засегаат сите. Почнувајќи од социјалните аспекти, политичката ситуација и воопшто менталитетот на еден народ, а секако, тука е присутен и унакажаниот дух на вашето родно Куманово. Колку текстовите допираат до вашите слушатели, има ли простор за промена на перцепција кај нив?

Темите ги прераскажуваат секојдневните приказни и нашиот поглед и став кон нив. Не знаеме дали и колку допираат песните до човекот, но доколку допрат и имаат некакво влијание тоа е голем успех.

Интересно е тоа што рапувате на кумановски дијалект, но со самата таа одлука се стеснува дострелот на, да речеме, интернационална публика. Кој е пресудниот фактор што и покрај сé продолжувате да творите на дијалект? 

Рапот е музика преку која се презентираш себеси и местото од коешто потекнуваш. Дијалектот е цврсто поврзан со нашиот град и текстовите ја сочувуваме неговата препознатливост и уникатност. А народски кажано „пазарот“ не е нашата мета, ниту цел.

Мора да го поставам и ова прашање. По што е препознатлив кумановскиот рап?

Рапот од Куманово е препознатлив по дијалектот, кој истовремено е интересен и суров, но и по самиот звук. Во Куманово можете да најдете само boom bap звук и познавачите на рапот во Македонија го знаат тоа. Имаме битмејкери и продуценти како што се T-Ghost, Fat Flow, Puca Cherep, Immex и сите ќе се појават на нашиот нов албум.

Свесни сме дека нашите издавачки куќи не се баш мотивирани да ја поддржат и промовираат андерграунд културата, па артистите се препуштени да изнајдат начин за себепромовирање. Како вие се снаоѓате со ова?

Веќе и поп музиката не е интересна за издавачките куќи, така да интернетот е единствената опција за промоција. Најдобро презентирање на бендот е концерт, но во државата ретко се случуваат настани за локални артисти и изведувачи.

Во Куманово постои независен издавач Kran Records, кој секогаш нé поддржува и ни помага во реализација на замислите. Куманово е окупирано од турбо-фолк, нема свој фестивал. Тука нема простор за оправдување, џебот е полн, а вкусот евтин.

За крај би ве прашал, верувате ли дека алтернативната сцена во Македонија во иднина може да засведочи вистински подем или ситуацијата никогаш нема да биде подобра, гледајќи го фактот што младите секојдневно се иселуваат?

Финансиската состојба во државата е лоша, сите ја гледаат својата шанса за надвор. Младите немаат свој сон за создавање на уметност, без разлика дали тоа е музика, сликарство или нешто друго.

Малкумина се интересираат за музиката и за нејзиното создавање, на најголем дел од нив идоли им се луѓе кои на брз начин создале пари, а музиката не им значи буквално ништо. 

Автор: Евгениј Хоуп | Црнобело