Ивана Горичан: Боенката за возрасни Euphorbia ќе ве одведе на поубави и посреќни места

Детали

четврток, 08 февруари 2018

Кога ќе се спомене боенка за возрасни сите прво помислуваме на Ивана Горичан и нејзината Боенка за креативен ден.

Охриѓанката, која живее во Скопје моментално ги завршува своите студии на Факултет за ликовни уметности, отсек графика и за себе вели дека и кога има слободно време и кога е зафатена таа црта. Нејзиниот Инстаграм профил, потпишан како @ivanagorican е виртуелен простор каде ги споделува своите уметнички остварувања.

„По Боенка за креативен ден и Мала боенка за големи креативци планирав да продолжам со правење на боенки, но можеби поминаа скоро две години, а јас сè уште немав добра идеја. Еднаш нацртав цртеж со цвеќе и инсекти, кој е дел од новата боенка, и си помислив, па ако нацртам уште многу вакви ете ми боенка“, раскажува Ивана Горичан.

„Сите илустрации се цртани рачно, што ја прави посебна. Исто така е печатена еднострано на дебела хартија, (скоро секој медиум е изведлив, од дрвени боички, фломастери до акварел) и листовите се перфорирани за потоа да можат готовите дела да се врамат. На секоја страна под секоја илустрација има називи на различни цвеќа на латински јазик, исто како и насловот Euphorbia“.

https://www.instagram.com/p/Be3ztMpHTuv/?taken-by=euphorbia_coloringbook

Нејзиното првенче Боенка за креативен ден се има продадено во речиси 4.000 примероци, иако Ивана сè уште е зачудена од успехот, сепак уште пред да ја објави си поставила високи цели.

Со Euphorbia не очекува ништо помалку, освен тоа што е со осмислена тема, новата боенка има и други предности во поглед на техничкиот дел.

„Од лично искуство можам да кажам дека боењето смирува, опушта, го носи умот на поубави, посреќни места“, споделува Ивана Горичан.

„Првпат седнав да избојам нешто дури сега од најновата боенка и навистина го почувствував тоа. Сакаш само да боиш бидејќи навистина создава некое магично чувство на самозадоволство и исполнетост. Порано си викав јас цртам нема што да бојам, но сега едвај чекам ептен да немам што да цртам за да седнам и да бојам. Боењето помага при стрес и е забавна занимација луѓето тоа да го прават и со сопствените деца“.

Откако заврши со боенката, приоритет на Ивана Горичан ѝ е да дипломира и да заврши уште неколку големи графики. Паралелно илустрира и некои други проекти од сличен карактер на боенката, кои планира да ги открие за неколку месеци.

И секако, тука спаѓаат и колажите од банкноти на кои секогаш посветено работи за да на крај направи една голема изложба на таа тема.

Автор: Евгениј Хоуп | Црнобело