Празнична бајка во домот на семејството Божинови во Битола: Тематски декорирани елки, уникатни украси

Детали

недела, 24 декември 2023

„Oваа година салонот го претворивме во една божиќна кројачка работилница. Направивме елка во форма на женска креација, додека пак старата ретро машина за шиење од мојата баба ја претворивме во вистински новогодишен украс. Околу украсувањето се трудиме заеднички сите фамилијарно", вели Никола од Битола за CRNOBELO.com.

Во пресрет на новогодишните и божиќните празници, вратата на својот дом ни ја отвори семејството Божинови од Битола, кое секоја година се труди да остави силен впечаток кога е во прашање украсувањето и декорирањето на домот за време на Новогодишните и божиќните празници.

Живеат во куќа на два ката, и секоја година нивниот дом е претворен во различна новогодишна бајка.

Разговаравме со едниот член од семејството, Никола Божинов стоматолог по професија, кој ни раскажа детално за новогодишниот и божиќен декор во нивниот дом.

„Да бидам искрен секоја година фамилијарно се трудиме да направиме нешто различно, ново и интересно вложувајќи многу труд, креативност и идеи.

Морам да кажам дека често нашите блиски пријатели и роднини благо речено ни се чудат бидејќи вложуваме толку труд и дека дури и најмалото ќоше во домот го украсуваме.

Куќата ни е на два ката, па поради тоа имаме три елки кои секоја година тематски ги декорираме.

Изминатите години акцентот на декорирањето го ставаме на салонот, бидејќи е навистина голем, и кога влегувате во куќата е прв на удар и највидлив. Па така, секогаш најголемата елка ја поставуваме во салонот.

Минатата година бидејќи во тренд беше розовата боја одлучивме елката и сè околу неа да биде во тој стил.

Oваа година салонот го претворивме во една божиќна кројачка работилница. Направивме елка во форма на женска креација, додека, пак, старата ретро машина за шиење од мојата баба ја претворивме во вистински новогодишен украс.

Околу украсувањето се трудиме и работиме заеднички сите фамилијарно. 

Често идеите ги даваме јас и мојот брат, додека во реализацијата најмногу ни помага мајка ми, а татко ми е секогаш тука кога треба нешто да се изработи или, пак, монтира.

Впрочем, од него го имаме крајниот суд дали сме завршиле добра работа во украсувањето.

Иако изгледа како да даваме премногу пари за украси, би додал дека во нашата фамилија имаме традиција каде секоја година мораме да купиме барем по некој украс.

Па така, најголемиот број од лампионите и украсите се собирани години наназад, уште кога моите родители ја купиле првата елка и кога имале само десетина лампиони на истата.

Често инспирациите ги црпиме од социјалните мрежи, ги адаптираме според нашите услови и ги надополнуваме.

Божиќните и новогодишните празници за нас претставуваат најубавиот период од годината, па затоа се трудиме таа магија да ја пренесеме и во нашиот дом, и потполно да уживаме во истата".

©CRNOBELO.com Забрането преземање и копирање. Крадењето на авторски текстови е казниво со закон.

А. Б. | Црнобелo