Во домот на Вероника: Стан од 71m2 во Карпош, со златни детали, 3 библиотеки и многу уметнички дела

Детали

сабота, 24 август 2024

„Низ целиот простор осветлувањето е во златна боја, а најголемо внимание привлекуваат двата клима уреди во златна боја, имаме 3 уметнички слики од Корубин, а омилен ни е балконот од 10 m2, опкружен со зеленило што е реткост во Скопје“ - Вероника Ефремова за CRNOBELO.com раскажува за уредувањето на новиот семеен дом. 

Вероника Ефремова (47), доктор на правни науки, работи како постар советник за владеење на право во меѓународна организација.

Неодамна, заедно со своето семејство, таа се преселила во стан во Карпош, кој заедно со професионален тим на архитекти, го реновирале и уредиле во класичен стил со елементи на модернизам. 

Во станот преовладуваат златните бои на елементите низ повеќе простории, а доминираат нијансите на кафеава и сива боја, но впечатливи се и библиотеките, бидејќи како што вели, сите се вљубеници во читањето. 

Во продолжение, Вероника за CRNOBELO.com раскажува подетално за уредувањето на нивното семејно катче:

Детството, тинејџерските години и факултетските денови ги поминав во Карпош и емотивно сум поврзана со оваа општина.

Затоа после десет години повторно со семејството се вратив да живеам тука и нашиот син да расте во средина која изобилува со паркови, зеленило и тематски забавни и спортски објекти.

Уметноста и дизајнот се нашето секојдневие, нераскинлив дел од нашиот живот. Првиот стан во кој живеевме со семејството самите целосно го дизајниравме и уредивме пред петнаесет години.

Овој пат поради огромните секојдневни обврски беше неопходно да се ангажира професионален тим за станот во Карпош во кој се преселивме пред два месеци.

Станот (71m²) беше во фаза на почетно реновирање. Бараше целосно архитектонско решение за изведбата и уредувањето на просторот.

Просторот во кој живееме треба да е рефлексија на нашата енергија, израз на нашата лична и уникатна иновација за создавање стилизиран ентериер.

Основниот принцип за совршен домашен декор е, се разбира, малку повеќе од комфор со одреден стил. Тоа е одраз на нашата индивидуалност каде секој член од семејството има свое организирано катче во кое креативно твори и ужива.

Во однос на идејата за дизајнот имав целосна претстава како сакам да изгледа со веќе избрани бои, детали и парчиња мебел. Сепак, беше неопходно сето тоа да се исцрта во 3Д и моите желби да се преточат во проект кој ќе се изработи.

Во денешно време кога се уредува внатрешен ентериер во домот најголема среќа е да најдеш тим од архитекти и мајстори кои ефикасно и навремено сето тоа ќе го изработат.

Затоа сум неизмерно благодарна на архитектите Андреј Клинчаров и Ена Савева кои сите мои замисли ги преточија во идејно решение за дизајн на просторот.

За време на процесот секако имаше непредвидени изненадувања (како на пример потреба за рушење на два ѕида, како и промена на одредени позиции и тонови на бои, но, сето тоа беше во насока на создавање на идеално катче за секој од нас.

Продолжува на следната страница...