Божиќна ѕвезда - најубавиот декоративен украс за празниците

Полека ги вадиме елките, лампионите и сијаличките на мегдан. Но, во многу домови може да се забележи и најубавиот жив декоративен украс, цвеќето без кое не може да се замисли празничната сезона–раскошната божиќна ѕвезда, или божиќното цвеќе.

Неговите бои варираат од нежна беж до најпрепознатливата црвена како крв боја.

Ова тропско растение, односно грмушка води потекло од Мексико или Централна Америка.

Покрај многубројните обожаватели на ова цвеќе, многумина го избегнуваат затоа што сметаат дека неговиот век е краткотраен и нема поента да се трошат пари на нешто што трае толку малку.

Но, со правилна нега, божиќното цвеќе може да издржи цела година, па дури и повеќе.

Откако ќе прецвета, треба да се премести во постудена просторија, бидејќи следува периодот на мирување. Тоа е она што треба да го знаете на самиот почеток.

Божиќната ѕвезда не цвета во текот на целата година, па не се разочарувајте кога настапува периодот на мирување.

Додека цвета пак, клучот е да се чува во малку постудена просторија.

Парадоксално, божиќната ѕвезда бара светло место (најдобро покрај прозорецот) и влажен воздух, но поладна температура.

Божиќното цвеќе или еуфорбија е растение со краток ден. Тоа значи дека цвета кога денот е пократок од 12 часа. Ако просторијата каде што е сместено е осветлена подолго од 12 часа тоа нема да процвета.

Како да ја спасите божиќната ѕвезда откако ќе прецвета?

Кога ќе паднат и последните цветови од раскошното црвено цвеќе, веднаш префрлете го во постудена просторија. Најдобро е температурата да биде некаде помеѓу 10 и 12 степени.

Во овој период на мирување не треба да го полевате растението.

Пресадувањето се прави во април директно во свежа и хранлива земја.

Скратете ги гранчињата на должина од околу 10 cm и внимавајте да ги запечатите местата со восок од свеќа или запрашете го со малку дрвен јаглен, со цел да не истече млекото од цвеќето.

Доколку млекото истече постои голема веројатност цвеќето да не процвета.

Свежо пресаденото растение бара малку повеќе светлина и топло место, повторно во близина на прозорецот. На почетокот се налева внимателно, а кога ќе почне да пушта нови гранчиња и ливчиња се залева пообилно, секогаш со млака вода.

Сега, откако ги дознавте чекорите како да го одржите божиќното цвеќе подолго во живот, време е да си купите едно (или неколку) за дома.

(О)Милена | Црнобело