Работи во домот кои НЕ треба да ги чистите со сода бикарбона + што да употребите како замена?

Сода бикарбоната може да ги изгребе мермерните површини, но и да направи дамки на дрвениот под и мебелот од дрво.

Ако сакате да користите поприродни средства за чистење, веројатно сода бикарбоната ви е омилена состојка, но не е препорачливо да ја користите за буквално сè.

Поради благите абразивни својства, сода бикарбоната е одлична за тврдокорни дамки, но истите својства можат да направат гребаници и да оштетат одредени предмети и материјали.

Кога да ја избегнувате сода бикарбоната и што да употребите наместо неа?

Мермерни површини

Генерално, мермерните површини се лесни за чистење, но треба да бидете внимателни да не ги изгребете.

Иако абразивните својства на сода бикарбоната не се многу силни, ако често ги чистите мермерните површини со неа, со текот на времето можат да се појават мали гребаници.

Покрај сода бикарбоната, добро би било да избегнувате и продукти како оцет и избелувач кои можат да го имаат истиот ефект.

Наместо тоа, за мермерните површини доволно е да искористите најобично средство за миење садови и топла вода.

Предмети со вдлабнатини

Немојте да ја чистите тастатурата, маусот или кои било предмети со вдлабнатини со раствор од сода бикарбона. Оваа состојка нема да ги оштети, но со текот на времето може да се наталожи во пукнатините.

За предметите како тастатура кои е тешко да се исчистат убаво, можете да направите раствор од ¼ шолја оцет и ¼ шолја вода, па исчистете ги тешко достапните места со чепкалка за уши.

Во растворот можете да додадете и една капка етерично масло за попријатен мирис. 

Стакло

Сода бикарбоната може да направи гребаници на чашите, прозорците, па дури и огледалата, па најдобро избегнувајте ја.

За прозорците наједноставно е да користите средство за стакло, но ако сакате поприродна алтернатива можете да направите комбинација од една шолја алкохол и една шолја вода, како и една лажица оцет.

За да го отстраните бигорот од стаклените чаши, повторно употребете раствор од оцет и вода.

Шпорет со керамичка плотна

Покрај тоа што може да направи гребаници на керамичките плотни, сода бикарбоната може и да се наталожи на нив, а потоа ќе биде тешко да ја отстраните.

Покрај средствата за керамички плотни, можете да направите и мешавина од оцет и вода. Ако плотната не е многу валкана, доволно е ја исчистите со средство за миење садови и мека крпа.

Алуминиумски тави

Сода бикарбоната е одлична за тврдокорните дамки на тавите, но избегнувајте ја ако станува збор за сад направен од алуминиум бидејќи може да предизвика оксидација и да им ја промени бојата.

Ако сепак морате да користите сода бикарбона, истријте ги само дамките и потоа добро исплакнете го садот.

Сребрен прибор за јадење и сребрен накит

Иако одлично ги отстранува нечистотиите од среброто, не е препорачливо да користите сода бикарбона за прибор, накит или што било направено од овој метал.

За темелно да го исчистите сребрениот прибор, направете раствор од шолја вода и ¼ шолја сол. Оставете го приборот да отстои во растворот околу 15 минути, па исплакнете го со вода.

За да го исчистите сребрениот накит, ставете го во сад со топла вода и неколку капки средство за садови.

За поефикасно чистење можете и да го истриете со мека четка за заби. Потоа само исплакнете го и исушете го со мека крпа.

Прочитајте и Дамки од мастило, пожолтени нокти – за што можете да ја користите пастата за заби?

Дрвен мебел и дрвени подови

Сода бикарбоната може да направи дамки на дрвените површини, да ги изгребе, па дури и да ги избледи.

За темелно чистење на дрвените подови, покрај купечките средства, можете повторно да употребите оцет – измешајте една шолја со четири литри вода.

За дрвениот мебел освен политура, можете да употребите и црн чај – ставете две вреќички во две шолји врела вода и откако ќе се излади избришете го мебелот со него и оставете да се исуши.

Спирова С. | Црнобело