Крзнени парчиња, синтетички јакни - Како да ја перете зимската облека без да ја оштетите?

Волнениот капут перете го со бебешки шампон, крзнените парчиња однесете ги на хемиско чистење или испрете ги на рака...

Грижата за зимските парчиња облека на многумина им задава главоболка.

Таа лесно се оштетува или се собира при перење, ако за неа не се грижите соодветно.

За да ги избегнете проблемите следниот пат кога ќе ја перете зимската облека, прочитајте ги овие совети. На тој начин ќе знаете што да правите со секој тип на облека.

Јакни со набори кои наликуваат на тенки монтки

Овие јакни се синтетички, па лесно се перат во машина. Но, за да не ги уништите, мора да следите неколку правила.

Прво, проверете дали има дамки, и ако забележите валкани места, поминете преку нив со мека ткаенина или со сунѓер натопен во благ детергент, а потоа исплакнете ја со студена вода.

Пред да ја ставите во машина, закопчајте ги сите копчиња и патенти.

Не ставајте белило или омекнувач и перете во студена вода, т.е на 30°.

Кога ќе ја извадите испраната јакна од машината, ставете ја на закачалка да се исуши, наместо да користите штипки и да ја закачите на жица, а не ја ставајте ни во машина за сушење алишта.

Крзнени капути или облека со крзнени додатоци

Иако крзените капути вообичаено се изработени од синтетички материјали кои се перат лесно, сепак, поставата на некои од нив можеби е од друг тип на материјал, па пред да почнете со перење, внимателно прочитајте ја етикетата.

За овој тип на облека, препорачливо е да го однесете на хемиско чистење, каде што ќе ви го исперат најсоодветно.

Но, ако сепак решите да го перете сами дома, тогаш направете го тоа на рака.

Во млака или студена вода ставете благ детергент и оставете ја облеката да отстои 15 минути, а дури потоа почнете да ја перете.

Не ја превиткувајте за да ја исцедите од водата (за да не ја стуткате), туку благо притиснете ја, а потоа ставете ја на закачалка да се исцеди.

Волнени капути

Пред да ги исперете волнените капути, прочитајте го упатството на етикетата.

Важно е најпрво да поминете преку капутот со четка за да ги отстраните „залепените“ влакна или прашина која лесно се собира на волнените предмети.

Ако забележите дамки, пробајте да ги исчистите со детергент наменет специјално за перење волнена облека или со детергент за светла облека. Детергентот тријте го во правец на влакната, и никако со кружни движења.

Волнениот капут може да го перете на рака или во машина.

Ако изберете машинско перење, закопчајте ги копчињата или патентните, па превртете го капутот наопаку.

На машината изберете програма „волна“ или „деликатно“ и наместете ја на минимален број вртежи за да не се истутка.

Ако пак, го перете на рака, користете бебешки шампон.

Џемпери од кашмир или волна

Џемперите од волна или од кашмир можете да ги перете на рака или во машина, иако е препорачливо да изберете рачно перење.

Најпрво превртете ги наопаку, за да го намалите оштетувањето или избелувањето на џемперот.

Измерете ја должината на ракавите и на самиот џемпер.

Ако изберете машина, ставете го џемперот на програма за деликатно перење, со студена вода.

Никогаш не ги ставајте овие парчиња во машина за перење.

Ако ги перете на рака, ставете студена вода во леген, па додадете детергент за волна или како алтернатива може да користите шампон за коса.

Оставете ги да отстојат околу 30 минути, па исперете ги во студена вода.

Кога ќе ја исцедите водата, ставете ги врз пешкир, па со рацете поминувајте преку самиот џемпер (како да го пеглате) за да ги издолжите и ракавите и џемперот колку што биле пред да почнете со перењето (затоа ги мерите на почетокот).

Дуксери

Дуксерите не треба да се перат по секое носење (бидејќи се оштетуваат), туку барем по 4-5 облекувања.

Честото перење го намалува интензитетот на бојата и создава „упки“, поради што дуксерите веќе не изгледаат ново и убаво.

Ако има патент, закопчајте го пред перењето, превртете го самиот дуксер наопаку и ставете го во мрежа за машинско перење облека (за да не се допира директно со останатите алишта).

Ракавици

Волнените ракавици може да се перат во машина со студена вода и на програма за „волна“,  или на рака, со шампон за бебиња или мек детергент.

Откако ќе ги исперете не ги превиткувајте за да ги исцедите, туку ставете ги врз пешкир кој ќе го впие вишокот вода. Потоа ставете ги на рамна површина за да се исушат.

Ако имате водоотпорни синтетички ракавици, најлесно ќе ги испрете на рака со благ детергент, ако претходно ги оставите да отстојат во вода.

Не ги перете во машина.

Рачно плетените ракавици се изработени од памук или полиестер, па може да се перат во машина, на програма за „деликатни алишта“.

А. Ј. | Црнобело