Чести грешки со кои сами ги уништуваме апаратите во домот

Ставате многу прашок во машината за перење и не ја истурате водата од пеглата кога ќе завршите со пеглање облека.

Квалитетните апарати како машина за перење и рерна можат да ни служат со години, но само ако внимаваме како ги користиме.

Дел од најчестите грешки со кои самите ги уништуваме апаратите:

Целата облека ја перете во машина

Машините дефинитивно ни спасуваат многу време, но не секоја облека треба да се пере во нив.

На пример, градниците е најдобро дa ги перете на рака бидејќи од машината побрзо ќе се оштетат.

Покрај тоа, нитните за закопчување може да се закачат на другата облека и да ја оштетат.

Исто така, немојте да перете во машина облека со големи метални додатоци, како и парчиња кои се многу тешки откако ќе се накиснат со вода бидејќи може да предизвикаат штета на машината.

Ставате многу прашок за перење облека

Ако го преполните садот за прашок, нема облеката да ви биде почиста, туку ќе си ја оштетите машината.

Со текот на времето, прашокот ќе се акумулира бидејќи машината нема да може да го исплакне. А, дел од него ќе заврши и на облеката.

Покрај тоа, ако имате почувствителна кожа, користењето многу прашок може да предизвика иритација.

Најдобро е да ги следите инструкциите на амбалажата од прашокот.

Не ставате доволно вода во бокалот за вриење

На бокалот за вриење вода е одбележано минималното количество вода што треба да го ставите.

Ако ставате помалку вода, со текот на времето ќе се расипе грејачот.

Исто така, не е препорачливо да го чувате бокалот до извор на топлина, како шпорет или рерна.

Ставате алуминиумска фолија во рерната

Во ред е да печете храна во алуминиумска фолија.

Но, не е препорачливо да ставите алуминиумска фолија на дното на рерната за да го олесните чистењето.

Алуминиумската фолија ја рефлектира топлината, а ова може да има влијание врз храната.

Може да ја попречува и циркулацијата на воздух во рерната, па дури и да се залепи на дното ако ви останала храна од претходно готвење.

Многу подобро (и поевтино) е, едноставно, да ја исчистите рерната, отколку да ризикувате да ја оштетите.

Не го чистите филтерот на фенот за коса

Филтерот на фенот за коса со текот на времето се полни со прашина.

И, ако не ја отстранувате, фенот ќе прегрева и ќе се расипе многу побрзо.

Препорачливо е да ја отстранувате прашината барем еднаш месечно, па и почесто ако го користите секој ден.

Не ставате доволно вода во пеглата за облека

Како бокалот, постои минимално количество вода што треба да стои и во пеглата за да не се расипе.

Исто така, немојте да оставате вода во пеглата кога ќе завршите со пеглање бидејќи со ова може да се акумулира бигор кој ќе ја оштети.

Користите блендер за многу тврда или многу жешка храна

Ако планирате да блендирате нешто замрзнато, почекајте малку да омекне бидејќи можете да ги оштетите сечилата на блендерот.

Исто така, не е препорачливо да ставате многу жешка храна во блендерот бидејќи можете да се оштети пластиката.

Спирова С. | Црнобело