Помалку познати симптоми на синдром на полицистични јајници (што не треба да ги игнорирате)

Подуеност во област на стомакот, болки во други делови од телото, крвавење кога немате менструација - сите овие можат да бидат знаци дека имате циста во јајникот која пукнала и треба да се консултирате со гинеколог.

Формирањето цисти во јајниците е релативно честа појава и генерално безопасна.

Во повеќето случаи, цистите сами исчезнуваат по неколку месеци и некогаш жените и девојките не ни чувствуваат симптоми.

Но, некогаш цистите пукаат и тогаш претставуваат ризик по здравјето на жената.

Во овој случај се јавуваат и симптоми кои не е препорачливо да ги игнорирате и потребно е веднаш да се консултирате со гинеколог.

6 симптоми за цисти во јајниците кои не треба да се игнорираат:

Болка во областа на карлицата

Кога цистите се поголеми или кога ќе пукнат, може да се јави болка во стомакот, поточно во областа на карлицата.

Најчесто болката е локализирана на едната страна, односно на јајникот каде што пукнала цистата.

Подуеност и отоци

Подуеноста е чест симптом на ПМС, а некогаш причината е и храната што сме ја консумирале.

Но, ако се чувствувате подуено, па забележувате и оток во областа на стомакот без навидум друга причина, консултирајте се со гинеколог.

Чувство на тежина во стомакот

Ако чувствувате како стомакот да ви е полн или имате чувство на тежина, а не сте се прејале и не ви се оди во тоалет, може да станува збор за циста во јајникот.

Болка во други делови од телото

Проблематичните цисти можат да предизвикаат симптоми и на други делови од телото, не само стомакот.

Некогаш може да се почувствува слаба болка во градите (како за време на ПМС), како и болка во нозете и долниот дел од грбот.

Проблеми при одење во тоалет

Во некои случаи цистите создаваат проблеми и при одењето во тоалет.

Односно, може да ви биде тешко целосно да го испразните мочниот меур или да почнете да уринирате.

Може и да се јави почеста потреба за уринирање.

Промени во вагината

Овие промени вклучуваат посилна болка од вообичаено за време на менструација, болка за време на секс, како и крвавење кога немате менструација.

Кога итно да побарате лекарска помош?

Ако ги забележувате симптомите што ги набројавме, секогаш е добро да се консултирате со лекар.

Но, веднаш побарајте лекарска помош доколку:

• Дишете забрзано и испрекинато
• Чувствувате слабост и вртоглавица
• Имате нагла и силна болка во стомакот
• Болката во стомакот е придружена со треска и повраќање

Спирова С. | Црнобело