Омбре усни, фризури во стилот на '90-те: Совети за матурска шминка и фризура од Даниел Николовски

„Кај шминката доминираат омбре усни. Со моливче се исцртуваат контурите на устата, се сенчаат, па се додава масло за усни за сјај“, вели зa CRNOBELO.com нашиот фризер и шминкер, Даниел Николовски, кој освен за шминка, сподели совети и за фризури на матурантките. Кои се неговите препораки?

Матурските прослави само што не почнале, а матурантките сигурно веќе избрале што ќе облечат и како ќе се дотераат за оваа вечер.

Но, аутфитот е само еден дел од целата матурска сложувалка. Подеднакво важни се и шминката и фризурата, кои ќе го дополнат изгледот што си го замислила секоја девојка.

За да не згрешите во шминкањето или при изборот на фризура, еден од нашите најдобри шминкери и фризери, Даниел Николовски, за CRNOBELO.com сподели неколку совети за сите идни матурантки.

Што е во мода оваа сезона, а што треба да избегнувате кај фризурата и шминката за да изгледате совршено на вашата матурска прослава?

Прочитајте ги советите од Даниел Николовски:

’90-те се вратени на голема врата и во светот на шминката и кај фризурите, па она што доминира е поприроден изглед со строги линии.

Кај фризурите тоа се високи пунџи и спуштени прамени, а кај шминката се мат бои на сенка со омбре усни.

Кај кармините доминираат земјени тонови без многу свежина - кафеави нијанси, темни бои накај „џигер“, но се надополнуваат со масло за усни (lip oil).

Со моливче се исцртуваат контурите на усната, се сенчаат, а потоа се додава маслото за усни за да се добие сјај.

Многу често девојките на усните ставаат само concealer, а потоа врз него сјај за усни во боја или масло за усни за сјај.

Сенките оваа сезона се мат, и тие ги заменија мрсните сенки и светките, кои беа во мода неколку сезони.

Боите и кај сенките се посмирени, а најактуелни се кафеавите нијанси.

Руменилото е во посилни бои со малку поостри линии.

Ова е период кога доминира трендот на свежо лице, без многу шминка, а повеќе со контури и без пренагласени трепки.

Различни стилови се во мода, но најважно е матурантката да се пронајде во тоа, да биде своја и да се чувствува убаво.

Оваа сезона е сменет и стилот на гардеробата, а тоа значи дека девојките ќе може да експериментираат со шминката и фризурите и да изберат интересни идеи за својот матурски изглед (на пример црн кармин или силно нагласени линии на очите), а тоа да не е само романтичен look, како што беше во последниве 7-8 години.

Ова се години кога девојките го градат својот стил и се пронаоѓаат себеси, па мој совет е што и да изберат како шминка и фризура, да задржат дел од себе во целиот изглед и да не отстапуваат од тоа за сметка на изгледот на таа една вечер.

Важно е девојките да имаат голема самодоверба и да знаат да го носат тоа што ќе го облечат во комбинација со шминката и фризурата.

Ако слепо ги следат трендовите, тогаш, оваа самодоверба нема да дојде до израз, а целиот впечаток ќе биде млак, колку и да е таа убаво средена или нашминкана.

Денес има уште неколку нови техники на бојадисување на косата и нов спектар на бои кој е многу актуелен, па доминираат нијансите на мед и килибар.

Но, стојам зад тоа дека промената на бојата на косата, особено пред ваков важен ден, мора да се направи во консултација со професионалец, а не дома, на своја рака.

A во однос на фризурите препорачувам собрана коса и пуштени прамени.

Каде грешат матурантките? Па, не знам дали може да згрешат, бидејќи, од една страна станува збор за моментална инспирација на девојките и тоа е основата за изгледот, а од друга страна, знам дека повеќето матурантки одат на професионална шминка и фризура.

Според мене единствена грешка е ако се претера.

Според мене, самиот фустан е некогаш доволно раскошен, впечатлив и убав, па накитот треба само да го дополни изгледот. Истото се однесува и на шминката и фризурата.

И обратно, ако фустанот е едноставен, тогаш шминката и фризурата треба да се погламурозни за да се остави силен впечаток.

Опција е и уметничка (арт) шминка, само ако е нанесена со вкус и умерено.

©CRNOBELO.com Забрането преземање и копирање. Крадењето на авторски текстови е казниво со закон. 

А. Ј. | Црнобело