Митови за нега на кожа што често се споделуваат на Инстаграм и ТикТок, според дерматолог

Витаминот Е не ги отстранува сите лузни, а пиењето вода нема да ви го реши проблемот со сува кожа. На кои митови за нега на кожа треба да заборавиме, според дерматолог од САД?

Благодарение на бројните видеа за убавина на ТикТок и Инстаграм, слушаме секакви совети за нега на кожа.

Проблемот е што во голема мера, овие совети не се од дерматолози и стручни лица, што значи не сите се добри.

Свесна за бројните лоши совети за нега на кожа, Линдзи Зубритски, која е дерматолог од САД, на ТикТок споделува кои се најчестите митови за нега на кожата што ги гледаме на социјалните мрежи.

„Не сум сигурна каде почнаа лагите за негата на кожа, но како дерматолог, овде сум да ја откријам вистината“, вели таа.

Во продолжение, митовите што д-р Линдзи смета дека само ни штетат:

Мит 1: Пиењето многу вода ќе го реши проблемот со сува кожа

Д-р Линдзи истакнува дека пиењето многу вода нема да ви помогне со овој проблем.

„Да, пиењето вода е добро за целокупното здравје, но нема да ви ја среди сувата кожа и нема да ви го исчисти лицето од акни“.

Сувата кожа е причинета од разни внатрешни, но и надворешни фактори како животен стил, студено време и греењето во домот.

За да се справите со овој проблем, подобро е да користите кремови и продукти за таа намена.

Секако, никогаш нема да погрешите и ако се консултирате со дерматолог.

Мит 2: Витаминот Е ги отстранува лузните

„Жал ми е, но нема истражувања што го потврдуваат ова“, вели д-р Линдзи.

Она што е познато е дека витаминот Е е антиоксидант кој го поттикнува заздравувањето на кожата.

Но, не значи дека продуктите со овој витамин ќе ви помогнат да се ослободите од сите лузни.

Во овој случај, секогаш е најдобро да одите на дерматолог.

Мит 3: Нема потреба од крем со фактор

Кремот со фактор е неопходен во летните месеци. Но, многумина го прескокнуваат кога е постудено.

„Ова е мит што вистински ме нервира. Луѓето ми кажуваат дека не користеле крем со фактор бидејќи не излегувале. Многупати кога некој ќе дојде во мојата клиника и ќе ми го каже ова, го прашувам како стигнал до клиниката.

Дали го изнесовте кучето на прошетка? Дали сте излегле од дома за да фрлите ѓубре? Ако одговорот е да, тогаш треба да ставите крем со фактор“.

Мит 4: Секој дел од телото секојдневно треба да се мие со сапун

Д-р Линдзи истакнува дека луѓето кои имаат проблеми со кожата, треба да размислат дали е во ред да користат сапун за секој дел од телото, секој ден.

„Ако имате многу сува кожа или егзема, користете сапун за одредени делови од телото како пазуви и гениталии“.

Односно, ако имате многу сува или иритирана кожа, подобро користете понежни шампони.

Истовремено, нема потреба секој ден да го миете целото тело со шампон или сапун ако имате проблематична кожа.

Со сапун измијте ги само деловите како пазуви и гениталии, а за остатокот е доволно и само вода ако имате навика да се туширате секој ден.

Спирова С. | Црнобело